الأحد، 29 ماي 2011

منامة ...



البارح في الليل جاتني منامة ... شفت فيها أجمل حمامة ... كانت بيضاء ، لا شقراء ... نسيت ... نسيت الشكل و اللون ... أما باقي نتفكر المضمون ... شفت فيه تاريخ الولادة ... وكيف قالتلي نقص من البلادة ...معاش وقت عليك ... يزي من النوم يهديك ... تحرك وحل عينيك ... 

قداش عجبني صوتها ... بكلو حنان ، بكلو دفا ، وغلا ... بكلو أمان ... وجهها كان يشعشع نور ... مش كيف بقية الطيور ... وأنا نعشق فها وكأني مسحور ... نراقب فيها وفي تحركاتها ...ما أروعها كيف تخفق بجناحاتها ... هزت جناحها وقربتلي ... ولصدرها ضمتني ... كانت ليا أنعم وسادة ... شربتلي شقايا وتعبي ... فرغتلها قلبي المعبي ... دموعي تنشفو في حضنها ... تمنيت وأنا في حماها نرجع صغير ، نلعب من تحت خصرها ... نجري ونشاكش ووقت نتعارك تواسيني ... وقت يطيب الفطور تناديني ... وكي نمرض ببسمتها تشفيني ...

تحرسني في الليل ... توكلني ، تشربني ، وترقدني كيف نفيق ... تخرجني من كوابيس الدنيا إلي فيها وليت غريق ... تمنيت نشوف روحي فيها ... نغرق في عينيها ... تحليلي الدنيا ومن ألوانها تعطيها ... 

حلقت الحمامة بعيد ... وحلقت معاها أحلامي ... حليت عينيا ولقيت تصويرتها قدامي ... 

أمي ... إلي رضعتني وداواتني ...كبرتني وبعطفها حماتني ... سهرت الليل تنشفلي في دموعي ... تحرمت مالنوم ونساتني جوعي... أمي ... شكون غيرك يفهمني كيف نبدى فرحان ، ويفهمني كيف نبدى تعبان ... شكون غيرك يعرفني فاش سرحان ... صوتك كيف نسمعو خيرلي من ألاف الألحان ... ندور العالم وصدرك يبقى أحلى مكان ...  أمي ... سامحني كان نهار وجعتك ... سامحني كان بكيتك ... سامحني كان غبت ونسيتك ... سامحني كان ما هزيتش عليك التليفون و محيرة خليتك ... على خاطر كنت عندي ما نعمل ، على خاطر عندي مع شكون نحكي ... سامحني يا أمي من قلبي  نوعدك تشوفني على قريب ، وننساو الماضي الصعيب ...  
إقرأ المزيد... Résuméabuiyad

الاثنين، 16 ماي 2011

ضحكولو تمد على طولو



أية سيدي بعد ما شفت الفيديو البارح متاع هاك الصحفي متاع حنبعل روحي طلعت ، إي نعم روحي طلعت من هالناس إلي هزت القفف أشكال وألوان إلي بالوذنين وإلي بلاش ... ويجي ليوم بكل رشاقة ولباقة يقلب الفيستة ويولي وطني من الطراز الرفيع ... يا أخي لا تطلب السماح من الشعب ولا تقول راني غلطت كيف كذبت عليكم ... مسيبة هيا ؟ يا سي العمري يرحم بوك أسكت تصون قدرك خير ... ثمة برشة عباد كنت نحترمهم ونهار إلي حلو فامهم حسيتهم تافهين ... 

يا أخي يلزم ناقفو وقفة صحيحة مع العباد إلي كيف هكة ... تي شنية الحكاية إلي يجي يولي شريف ونظيف ؟ و
قول هما ما أصح رقعتهم ، وجوهم بالكاغت الأحرش الرهوط ... يبات بنادري يصبح رجال ... والديكم وقت العباد تاكل في الكلاط في الحبوسات انتم تلحسو لسيدي الرئيس ... كان عندكم الخيار انكم تعملو كيف أغلبية الشعب ، تحشي راسك في التراب وتسكت ... أما زايد العيب موش فيهم ، أما في الشعب التونسي إلي ديمة يسامح ...

هزيت القفة ؟ ميسالش ... ضربتي بالمتراك ؟ ميسالش هذيكة خدمتك وزيد إنت عبد مأمور ... إي عبد مأمور لتو نتذكر نهار مشيت للفينال متاع كأس تونس بين الإفريقي والملعب التونسي وكليت المتراك على خاطر سي البوليس قلي ازرب روحك وأنا نمشي في عقلي (ساقي كانت مفصوعة بالسيف لا نتحرك) ... لتو نتذكر كيفاش طلعوني في الباقة ودخلو فيا ستة وإلا سبعة على خاطر خرجت في مضاهرة متاع فلسطين (الإنتفاضة الثانية) ... وبعد يجي ينوح يقول مكره ؟ مكره هزني نصحح إلتزام ... مكره اعطني شلبوق أو ضربة بالمتراك ... أما مكره تمحقني ؟ حلوة هذي ... 

والعجيب والغريب في الأمر أن من التوانسة من يساند ويصفق للحيوانات هاذم ... ومن يساند ويصفق للي عمل منهم قرون وعمل حزب وانتم تعرفو خير مني شنية الأحزاب هذي وشنية الأفاق متاعهم ... عندنا عشرين مليون سارق وقاتل و قلب من كلاب التعذيب ... لا واحد بيه شفناه يتحاكم ... لا واحد شفناه حتى مسلسل ثماش ما يبرد الغل إلي في قلوبنا ... ومن بعد تخرجلك الأغلبية الحمقة وأشباه المتعلمين ويحكيلك على إقتصاد ... زعمة زعمة نفهم في الإقتصاد وأنا راني قريت وتعلمت موش كيفكم ... 

القضاء باقي محكوم من عند ما نعرف شكون ، والدوسيات الصحاح باقي مشدودين عندهم ... أما واحد كيف يوسف كابوط يعملو فيه قضية عسكرية ويقيمو عليه قيامة وهو جملة صحيحة ما يعرفش يكونها ... تو بربي هذي موش سياسة بلهاء ؟ 

أما زايد اليوم اللوم كان علينا احنا ... على خاطر فينا إلي تساعدو الحكومة هذي خوفا من حمة الهمامي أو النهضة ... اش عليك الشعب ما يعرفش يقرر مصيره وحدو ... ثمة شكون كيف يشوف فرخ صغير يلوح في الحجر على البوليس يجي مع البوليس ويستحلاها في التونسي (خوه) كيف يتمزبل ... اللوم على الشعب إلي كل واحد فيه يحركو حب تونس ، أما في عوض يتحدو هما يفرقو في بعضهم في جرت حكاية تافهة ... واللوم علينا احنا لأنا ما نترباوش وما نتعلموش من الماضي ...        
إقرأ المزيد... Résuméabuiyad

الأربعاء، 11 ماي 2011

كيف نتذكر بوب ولد المارلي





اليوم باش نحكي في موضوع بعيد على الثورة والسياسة والغفاصة ... اليوم باش نحكي على الذكرى 30 من رحيل صاحب الفن الجميل ... روبارت نستا مارلي الملقب بال"بوب مارلي" ... 
اييه يا حسرة كيف كنت مغروم بالبوب وصوتو ما يفارقش مسمعي لما كنت صغير ... يا سيدك ملي نقرا في الروضة كان السيد الوالد يحط البوب في الدار وأنا تلقاني نسمع ونتبع وهو في حقيقة الأمر نخرم وحدي ... كنت نثبت مليح على الغناية هذي :


كنت وأنا نلعب في الصدار نبدى عامل كيف عليها ... امشي يا زمان وايجة يا زمان ، كان عندنا حانوت كاريه واحد حجام ... السيد كان حوات (أما موش صاحب الراجحي) ورستمان ... حياتو للبوب واتباعه ... كان في الدخلة مصور تصويرة البوب وفي كل تركينة عندو صنبة متاع البوب ... وداهن الحانوت أحمر وأصفر وأخضر و المنشفة متاعو عليها علم الجماييك وبالطبيعة أعفيكم من التفاصيل و شنوا يعمل كيف يجي الليل ويسكر الحانوت ويحط الفن الجميل ... 



كان هو إلي علمني كل ما يمت بصلة للريغي والرستفاري ... وزاد حبني نهارت إلي هزيتلو كسات قديمة ولقا فيها غناية كان قلب عليها الدنيا وما لقهاش ... وبزهرو الغناية كانت كل شطر في "فايس" متاع الكاسات ... 



من ثمة وأنا بديت نبحث وحدي في العالم متاع الريغي ... كنت في ألسنة سابعة لما عملت "كلاسور" ونحط فيه الكلمات متاع الغنيات ... ونثبت الصيف إلي بين السابعة والثامنة خدمت فيه مرمة ... كنت خدمت مع بياض يدعى "شقلاب" وفي الأخر قلبني في عشرة لاف لتو نسالهالو ...  عدة سيف كامل وأنا من قرقاش لقرقاش ، ومن قصدرية دهن لقصدرية السرفاسير باش في الاخر دبرت تفتوفة شريط بهم "بافلوات" كبار باش نسمع بهم الفن على أصولو ... 


والتنبك متاع الغرام عام التاسعة ... قرا معايا صديق حميم ليا كان يعزف الغيثار و أنا كنت نغني البوب ... وزيد قراني أستاذ انكليزية مغروم بيه ... كان العام محصور بين "البافلوات" .. دار صديقي والحصة متاع أستاذ الانكليز ... وعامتها تفرجت نهار في فيلم على قناة ألمانيا نسيت اسمها وأخر الفيلم حطو غناية البوب ... من يومها وأنا وليت نعتبرها أقوى غناية متاعو ...



وصلت نرقد فوق الطاولة ... راسي فوق الكتاب إلي يحكي على قصة حياة البوب وبافل من اليمين والأخر من اليسار ... كنا أنا وصديقي نصورو راس البوب على ذرعاتنا ونبداو شمخانين تقول اش عاملين ...  هبال قعد متبعني سنين ولو أنه نقص كيف وليت في الليسي وتغرمت ب"بنك فلويد" و-"داير ستريت" و كذلك الفن الشرقي من أم كلثوم وفيروز ، ماجدة والعديد من الأسماء ... الهبال قعد يجري في دمي إلي خلاني في ألسنة الثانية متاع الجامعة نعمل شعري "دريد لوك" كيف البوب ... أما كانت تجربة قصيرة لأني بعد ما قديتو ما حملتش اللهوة بيه ... جوجمة ... وليت عملتها قرعة عالمية شاخو فيها صحابو ضرب ، لا تربحهم  ... 

تو انجم نقول أني معاش مغروم برشة بالبوب أما باقي عند نوستالجي للغناء متاعه وساعة ساعة نحط نقشة نوسع بها بالي ...     

إقرأ المزيد... Résuméabuiyad

الاثنين، 9 ماي 2011

الباجي في حمام النساء

شادية رشدي 

البارح وأنا نتفرج في السبسي ، إستغفر الله ، نتفرج على السيد الوزير الأول للحكومة "المؤقتة" ... حسيت روحي قدام عبد العزيز العروي ... بابا الحاج بهيبتو المعتادة محلق في وسط الصغيرات ولاهي ينكت وبالطبيعة ساعة على ساعة يجبد أية قرأنية ثماش ما يبهرهم بصدق قوله 

السبسي يبدى بتهمة كبيرة يوجها للراجحي ... فاسق ... الفاسق هو من خرج عن الملة ... فالفسق والكفر يجيو في نفس المرتبة عند الله بحيث يقول (وكره اليكم الكفر والفسوق والعصيان) ... وبالمناسبة سي الباجي نسى أن يتفكر قوله تعالى " هل يستوي الذين يعلمون والذين لا يعلمون " و " هل يستوي الأعمى والبصير

هجمة شرسة على الراجحي ...بالمناسبة كلام الراجحي لا يلزم ناخذوه وكأنه قرأن أو نضربو به عرض الحائط ... كلام فيه وعليه ... أما الحاجة إلي موش فاهمينها برشة ناس في الحكومة وإلي مسندينها أن الراجحي قام "بتأكيد" بعض الشكوك وإعطاء بعض الأجوبة (سواء كنت اجتهادات خاطئة أو معلومات صحيحة) لبعض تساؤلات الشارع التونسي ... و هذاك علاش لقات إستجابة كبيرة من الناس ... ربما النقطتين إلي غشو بابا الحاج هما أن الراجحي حكى على اللطيف وقال بأن الجيش ينوي تسلم الحكم في حالة ما إذا النهضة ربحت ... لكن هل هذا يفسر المنطق العادم إلي ستعملو البارح ... ناقص كان باش يحكي بما تحت الحزام 

إذن قلت هجمة كبيرة بمنطق متاع باندية  بحيث إستعمل سياسة "كف وكعبة حلوة" مع الصحافيين إلي مانيش باش نحكي عليهم لأن الناس الكل تعرفهم ... نحب نقول هما يستحقو الكلاط أما موش من عند السبسي لأنها موش مهمتو ... شنية إكتبو وأعملو هاي ولات تسخير الصحافة لخدمة الدولة عيني عينك ... ومرة على مرة يرميلهم كلمة حلوة وتشوف عادة هاك الإبتسامة العريضة تعلو على وجوههم فخراً وإعتزازا بما حققوه من تميز في ميدانهم 

من بعد السبسي اتحفنا بجملة من الأكاذيب (زعمة تذكر هنا الأية إلي بدا بها اللقاء متاعه ؟) ... ومن أجملها هي أن رشيد عمار قائد أركان الجيش عظم الله أجره لبس "كوستيم" ومشى لقطر يلوج كيفاش يركحهم على مشروع إقتصادي هايل يطير بإقتصاد البلاد ... بحيث فكرني في التدوينة السابقة وهاك المقولة متاع "أنا بهيم والشعب التونسي لا يمثلني" ... الراجحي خرجوه على خاطر حط مدير حرس  وطني من عهد بن علي ... إذن نقيلوه ونحطو الصيد وما ادراك ما الصيد ... بحيث مازال يبرئ في اللطيف إلي بفمو قال إلي هو يخدم في السياسة تحت حس مس ... وباش يكمل الفيلم متاعه يدعو الناس إلى التحلي بالرجولية وألإتجاه إلى القضاء ورفع القضايا ... وكأن القضاء أصبح مستقلا ... وبالطبيعة أشار إلى بعض الأحزاب إلي قاعدة تقود فينا بالسلاسل نحو الديمقراطية والحرية ... التجديد والبي دي بي ... وهذي حاجة ما تجينيش غريبة منهم الثنين .. بحيث بقية الأحزاب "أين أنتم ؟" 

القناصة ما ثماش ... بحيث حتى من الراجحي الفاسق موافق معايا في هذي ... الشعب التونسي الكل خرف و كان يحلم وحتى إلي شدوهم (ما إسمهمش قناصة) تحاكمو ... إي قداش تحاكمو ؟ ووقتاش ؟ أساميهم ؟ وشنية التهمة إلي توجهتلهم ؟ ... و هاذم فيسع تحاكمو وتبلعو في الحبس والأخرين تولي العدالة تاخذ مجراها ؟ 

سؤال بعد ما تبينا أن السبسي يكذب ... مزال شداد صحيح ويحب يحاسب الراجحي ؟ 

الحاجة الوحيدة إلي عجبتني (مش برشة) في الخطاب وقت حكى على معرفتو للدولة ومفهومها ... صحيح عندو خبرة ويعرف الداخلية ولكن هذا ما يعنيش أنها حكر على الشياب ... بحيث كان ينجم يحط إنسان عنده شخصية قوية قادر على تنظيف الخمج والعفن الراسب منذ سنين 

سامحوني راني مزلت دايخ ، صبحت عند الطبيب ، قريب ننسى إلي البوليس متاعنا طلع عندو مشكلة نفسية ... والله سخفوني مساكن قريب نتبرعلهم بلحمي يفشو فيه غلهم بحيث يسترجعو بالتالي كامل هيبتهم ... يمكن من زيادة الشهرية إلي خذاوها بفضل الأش وميتين شهيد مرضو نفسياً ... يمكن زادة على خاطر قعدو مديدة ما يسمعو في الناس تحكي  بحرية وتقول عليهم إلي هما موش وطنيين وكلاب ... ونساو هما الكلام الحلو إلي يستقبلو به المواطن في المراكز بخلاف عادة كيف تبدى عامل عملة ... بالمناسبة هاو قلك الصحفي باش يولي لابس كسوة خاصة حتى يتمكن البوليس من التفريق بين الصحفي والمواطن ... بحيث ما تتلزش الداخلية وتطلب السماح من الصحفي على خاطر مشى في 
بالهم مواطن 

إقرأ المزيد... Résuméabuiyad

الجمعة، 6 ماي 2011

زوبعة الراجحي ...كاليمارو يخبركم بالحقائق الخفية



ليلة الأربعاء الأمور مريقلة ... الشعب لاهي في وحدة ملحدة إلي يسب وإلي يدافع ... والأخر ينبر عالنهضة والأخر يصيح يا ولادي يزيو ... تي الحاصل شي يعمل الكيف ...
عمك السبسي يجبد فيه خميري على الجراية ، راسو فوق فخض العزوزة و يشخر ... وهي في يدها زوز مساسك تخيطلو في مريول للشتاء القادمة ...

شرن شرن ... شرن شرن 


- أووه ... شكون هذا الثناش متاع الليل ... ما يكون كان رئيس حزب من احزاب الكاكوية يكلم في البجبوج الغالي يحب يشوف معه كيفاش يسلكها في الإنتخابات ... آالو ، إنت منهو ؟

- فؤاد ، فؤاد ... فيسع عديلي السبسي راني راسي باش يطرشق ...
- أهوكة فن يوجعك راسك كلم السبسي سيدي ... موش قتلك معاش إتدور بيه ... شيبة جهنم !!
- تي هيا عاد ... وراسك حكاية اكيدة ...
- باجي ، باجي ... قوم هاو فؤاد يحب يحكي معاك ..
الباجي حل عين وشهد وقال اللهم ارزقنا الصدق في القول والإخلاص في العمل ...
- تي شكون فؤاد ؟
- فوفو فوفو ...
-شيحب الرمز هذا ... أهلا بالمبزع شتحكي ؟
- اجري يا سبسي اجري ... هكا الراجحي بيركنا ... إي نعم بيركنا ودخل فيا غولة ت ت ت تسمع فيا ؟ 
- شبيه زادة ... ما يحبش يطيع ولي الأمر ... يخي ما سمعنيش كي قلت " فلا وربك لا يؤمنون حتى يحكموك فيما شجر بينهم" ؟ 
- تي فك علينا يا باجي ... ماكش في التلفزة باش تحكي هكا ... إسمع رهو هبطو حوار مع صحفي في شسمو ... تي كلي عالكمبيوتر إلي كان مرتحنا منو  عمار ... (صوت بحذاه ... فيسبوك) ... إي عالفيسبوك راس البلا ...
- ينعن د ... ويقص عليه فوفو 
- يزي يا بجبوج المرى حذاك هع هع هع ... أما ما إنطقك كان أنا 
- وإنت ثمة واحد ما نطقتوش ؟ حتى الكرسي إلي بارك عليه يتشفع منك ... أية خلي نمشي نشوف الحكاية ...

تلفت بجبوج للمرى ... 
- أية حل حل ... حل الفيسبوك ونحي من يديك الصوف ، أنا بش تشعل فيا النار وإنت تحب تغمني في مراول صوف ... هالليلة الكلبة
- اللطف عليك ، بعد عمر طويل ... 

قحرلها بجبوج ... وقامت تجري وقام هو وراها ، يعثر في البطانية ويشربها ... تجي يدو في صحن الغلة وتتغفس كعبة برقدان ... يقوم يلعن ويسب ويمشي يجري ورى المرى ...

- أية اكبس اكبس ...
- ووووه يا باجي ... نسيت كلمة السر 



- تي مش مشكلة نتفرج في فيديو ومن بعد تفكرها وحدك 
- تي لا أما ... أما ... دنكست راسها ووجهها بدا يصفار ... شمت ريحة النتونة ...
- إو ، حتى أنا على شكون معول ... انتم متاع مناصفة ؟ يرحمك يا بن لادن ... غير الدنيا ... استغفر الله ...  إذهب من قدام وجهي انتي ، هل عفشة ...
- تي ستنا شوية تو نعمل فايسبوك جديد ...
- فايسبوك جديد ؟ اللهم لا تؤاخذنا بما فعل السفهاء منا ... برى يراك مغفصة تحت كميونة .... ونضحك من قلبي كيف نشوفك معجونة ... ما تموتش وتعدي بقية حياتك مغبونة  ... ملي عرفتك الكبدة متاعي ممروجة ... يا حسرة عليك يامي دوجى ... كيف كنت نركش حذاك انتي وخدوجة ... أية كملتش ؟
- يا باجي بجاه ربي إنعل الشيطان وأخطاني دقيقتين من زمان ...
- شنية أخطاني هذي ؟

يقدم بجبوج ويوخر ويجبد هاك الخمسة ويلسقلها شلبوق حلايبي ، مرياتها مشت كزاز فيكزاز ...

- تضربني ؟ الليلة نبات في دار بابا ... معاش نزيد فيها حتى دقيقة ...

الباجي بعد السورفاق حس روحو تفرهد شوية ... جبد السبسي إلي وارثو من عند عزيزو الله يرحمو ... شعلو :

- هيا وين عندك تمشي ... بش تحل الفيسبوك ولا نمشي نشوف وين نتفرج ؟

قعدت تتفرج فيه وساكتة ...

- هز الباجي روحو وخرج في بيجما للجردة وجبد التليفون ... أهلا بالملعون ... اش من عملة عملت يا سي الزفت ؟
- الباجي ؟ أكهو ماو قلت الصدق في القول ... إلي جابها لساقيه ... 
- إي أما حتى انتي جبتها لساقيك ... ولما بين ساقيك ... ماهو مزلت عامل كلكسوين متاع الدبابز ؟ 


- يا باجي تو هذا كلام ؟ اش موصلنا لها المواصل ...
- تعرفش كيفاه ؟ أية أخلط عليا للمخزن متاعي ... خلي نحكيو في الرياض ..
- تي شباش نقلك ، تو تو نعمل في كعبات مع سي اللطيف ...
- اه فيسع وليتو أصدقاء ؟ أية ميسالش جيبو معاك ... وإلا لا خليه هو يسوق خير هههه 
- هههه وحدو بجبوج ... ما تفهمني كان انتي 

بعد بنصف ساعة قدام المخزن ...

-هيا يا راجحي براس أمك أهبط من الكرهبة ...
- خويا لعزيز ... يا لطيف يا باهي ، يا لطيف يا معذبهم ، يا لطيف يا مخمرني ... نكمل نسمع غناية "يا روما" ونهبط ...
- هيا "الباطري" متاع الكرهبة باش توفى ... أهبط يرحم بوك ... أية هاو واحد فاوح تي أهبط ...
يهبط عمك فرحات ضربة عاليمين ، وضربة عليسار ، الفواقة تهز فيه وتنفض ... وهو يعاني في بدنو اش باش يهزو ... 


- استانا لطيف ما تدخلش ... عند مهمة بيئية ، مش اليوم عيد الشجرة ؟
- ههههه هيا ازرب ... باجي تعرفو ما يحبش برشة السهرية ...

- السلام عليكم 
- وعليكم السلام .. أهلا أهلا بالحبيبات ... والله محلاكم مع بعضكم ...
- عيشوا بجبوج ... يحلي أيامك ، شوف خوك فرحات محلا ضحكتو ...
- إي أما كلي لحلها شوية ولا ؟
- تي ماهو لازم يا بجبوج (وغمزلو تحت حس مس ) ...

دخلهم بجبوج وهزهم للطاولة إلي كان ينظف فيها ... فيها خضروات عرقانات ، فرحات عينيه حوالت ... 

- يا باجي يا باهي ، يا باجي يا تحفون ... يعمبو السياسة ، يعمبو الشعب التونسي ، الشعب التونسي ... تي ولا أخطاني منو لا تو يولي ينبر عليا أنا زادة ... تي هو حتى كي مشيت معاه في الخط ، طلع فيها طليعة ... هيا حطلي في يوم وليلة وايجة نحكيو ... عندك رجرج ؟

- إلي تطلب يا فرحات ، انتي السكين وأنا اللحم ... تدلل يا خويا الباهي ... 
- عندك ككاوية ؟ 
- لا تلقاها عند احزاب المعارضة هذيكة هع هع هع ... احنا إختصاص "شيبس" ...
- اه وزيتون مصير ... يا عيني عليك يا معااالم ...



تقدت القعدة ... وبداو من الأول يلعبو ويضحكو ... ينبرو على الشعب التونسي ... 

- أنا بهيم والشعب التونسي لا يمثلني ههههه 
- لا يا باجي لا ... احنا شياب حركة الإلتفاف بمخزن السبسي هععع 
- تي شبيك ها لطيف ساكت ؟ خوذ كلمة وأعطي كلمة ...
- خونا فرحات كلفلي السهرية غالية ... أنا من الفيديو فهمت إلي يحب على قهوة ... أما هو يقصد قعدة ... تو عشرين سنة نخدم في السياسة ... حتى قعدة لا تكلفتلي شحم دجاج كيف هذي ... يا خويا قداش يبعث ...

الحاصل دخلو يحكيو ويتلاكشو ... هما هكاك ويرن تليفون الراجحي ...

- أيوااش اللعب الماصط ... شكون هالعزاوي ؟ ألو ..
- سي فرحات الراجحي ؟
- إي نعم أنا هو بعينه وبطنه هع هع هع 
- سي فرحات احنا إكسبرس أف أم نحبو نعملو معاك لقاء في ما يخص الفديوات ...
- قعدة ؟ المرة هذي في القنطاوي ولا ما نجيش ...
- لا لا لقاء في الراديو أما مذبينا تو تو ...

الباجي ولطيف تغامزو وفهمو إلي هو الوقت المناسب ... وبداو يداعبو في الراجحي ...
- إي يا فرحات التليفونات في الليل والراديوات ... تي شكون كيفك ... صحة والله ...
- باهي كلموني نصيف ساعة أخرى خلي نخسل وجهي ونشرب شوية "راد بول"    

بعد بنصف ساعة كيف متفاهمين اللقاء في الراديو وخونا فرحات دخل الدنيا بعضها ... مرة يقول قلت ومرة ما قلتش ... مرة صوروني ومرة ما يعرف شيء ... يا ولدي مصيبة ... ومع كل سؤال هو يبدا يخمم باش يجاوب والباجي يحوطلو كرذونة في "المال" متاع الكرهبة ... بعد اللقاء ، باسو بعضهم وكل واحد شد داره ... فرحات روح فرحان عندو مخزون شهر مشروبات ... والبعض من الشعب التونسي يعسلو على داره ...  

تنويه : هذه التدوينة فكاهية تنبرية بحتة ... الغاية منها الترويح على النفس في وسط هالزوبعة متاع الأخبار إلي ما بين التصديق والتكذيب ... والرسالة متاعي هي أني شخصيا ما فهمت حتى شي  ... أي حاجة فيها تتوافق مع الواقع فهي صدفة لا أكثر ولا أقل ...       
إقرأ المزيد... Résuméabuiyad

الثلاثاء، 3 ماي 2011

مخرجة تونسية ملحدة ... إي ومن بعد ؟



الموضوع بش نحكي فيه كلمتين لأنو ما يستاهلش التطويل ... المشكلة الكلها في الوعي التونسي إلي ناقص وإلي لا بد معالجتو من القواعد ... من المدرسة ، الحكاية وما فيها المخرجة هذي ملحدة وقالتها في تلفزة تونسية يتفرج عليها الناس الكل ... بصراحة ما كنتش باش نحكي وكنت نكتب في تدوينة أخرى (خرافة من خرافاتي) ولكن كيف نشوف واحد كيف لسعد عصبان يحكي ويسب فهم وفي نفس الوقت يعمل في إشهار للمسخرية متاعو بعنوان "زنقة زنقة " وشفت مجموعات على الفيسبوك من النوع هذا قلت نقول كلمتين ...

باهي النقطة الأولى ... هي ملحدة ، هي تعبد الجرابع ... اش يهمنا فيها ؟ ... أنا حسب ما نفهم الدين الإسلامي ، يدعو المسلمين إلى أن يكرهو الكفر ولا الكفار ... يعني تكره أن تكون كافر ، وتكره أن ترى الناس تكفر ... ولكن لا تكره الكفار ... وبالتالي الحملة الشخصية المحملة على الإنسانة هذيكة نشوفها لا معنى لها ... هي لم تسب الدين بل رفضته وهذي حاجة تخصها، كان سبتو وقتها نقاش أخر ... 

النقطة الثانية ... لو كان باش ناخذو على حد راهو قناة سي نصرة ... خرمة بعل ... على خاطر هي "تسوق" في الكفر والإلحاد ... و هي بعد هذا الكل قناة خاصة وحتى كان تحب إتدورها أفلام إباحية ما يسالها حتى حد ... أما لا يخفى على حتى حد أنها قناة تفتن وتميع في قضايا الشعب ... وأنا إلى الأن باهت في العباد إلي تتفرج فيها ... تي ماهو كي ما يتفرج فيها حتى حد تو تسكر ... ونرتاحو ، تقعد عندنا كان تونس سبعة واحنا جونا في الأحد الرياضي ...

النقطة الثالثة ... هو أن في فيديو فيها كلام على اللائكية ... وبكل صراحة حنبعل تجيب وحدة تحكي على الكفر ومن بعد وحدة تحكي بالفرنسية على اللائكية ... هذا يعطيني فكرة على لائكية بعض الشلايك ... أنا اللائكية متاع الناس هذوكم ارفضها لأنها اليوم خايفة من أن يفرض عليها الدين غدوة يولي الأذان يقلقها والناس إلي تصلي في الصبح مقلقينها كيف سي الصغير أولاد أحمد ... هذي لائكية مطرفة غير مرحب بها في تونس وكيف هي تعتبر نفسها في حرب ضد "الإسلاميين" ... أنا اعتبر نفسي في حرب فكرية ضد المطرفين هاذم ... 

النقطة الرابعة ... الأنسة هذي ترفض أن يجبرها إنسان على أن تعتنق دين ... ولكن انتي ما تجبرش الناس على اللائكية ... جاية إنتخابات والشعب يختار ... وكانك قابلة للديمقراطية تقبل رأي الأغلبية وتحترم الشعب إلي أكثريتو مسلمة أحببتي أم كرهتي ... وإلي موش عاجبو ما عليه كان يعمل كوردة ... وحاجة أخرى مدام نحكيو على إحترام الغير ... كفانا من إعتبار كل ما يتعلق بالدين رجعي وظلامي ... أو بالأحرى الكذب على الدين وتلصيق كل ما هو ظلامي إليه ... وبالمناسبة لبرشة حيوانات يزيونا من الإشاعات على المسلمين ... إي نقول مسلمين لأن العديد أصبح يحارب الدين وليس يحارب في حزب إسلامي ... وعندكم بعض الأمثلة عن الإشاعات في مدونة المتنوشة ...   

النقطة الخامسة ... باش نخرج شوية على الموضوع ... فيما يخص هالمخرجين إلي عندنا ... صحيح ما يسالهم حتى حد ... أما بربي شنوا هالموضوع  ؟ على قلت مشاكلنا ؟ ... أو إلي يحكي ويلعبها مثقف ومفكر ويفهم في قوالب الدنيا والدين يقلك "حقوق المرأة" ... تي بربي أهبط للشارع وشوف المرى فاش تعاني قبل ما تحكي مساواة ... ياخي شبيكم ما تحكيوش على التجارة إلي تصير بالبنيات الصغار ؟ ما تحكيوش على حلول للقضاء على البغاء أو الحد منه ... مكبشينلي في شطر ميراث ... تي ماهو تحب الشطر إكتب لبنتك الشطر وفك علينا من حسك ... اه حكاية تعدد الزوجات ؟ باهي في تونس قبل ما يجي بورقيبة كان هناك ما يسمى بعقد القران القيرواني إلي تشترط فيه المرى أن زوجها ما ياخو عليها حتى مرة أخرى ... هذا إجتهاد بعض أيمة توانسة ... يعني إلي يجي يقول أن الدين باش يرجع بالتوالي راهو إما مهوش فاهم وما عليه كان يسئل وإما يتبوهم ووقتها ليا وليه ربي ... لأن حسب ما نشوف ، الطرف إلي ضد الدين هو إلي يحب يكون دكتاتوري بدعوى المكاسب والتطور فيضيق ما هو واسع ... تنجم تعمل وصوية كي انتي القوانين الربانية ما ساعدوكش ... هذا ونحب نذكر أن في أمريكا (وما ادراك) كبير العيلة فقط يورث والباقية ياخذو الشب (هذا لا يعني أن نحب نكون كيفها بل نحب نوري أن شطر التركة لا تعني التقدم)...

النقطة الأخيرة ... هي لمن يقدم لنا اللائكية كفانا تمعجين ... يا أخي فاهمين إلي اللائكية هي فصل السياسة عن الدين ... وكان تحب تو نقريهالك ... أما شنوا تحب تعمل في أرض الواقع ... شنوة إلي باش تبدل على قبل ؟ ... شنوا برنامجك للمجلس التأسيسي ... وكفانا كفانا من الحديث على التطرف الديني وعلى غيره  ...  راهو الحديث هذا باش يهزنا للهاوية ... هاو جماعة رافعين قضية بالنهضة ... تي بربي شنوة الخرم هذا ؟ وكنت حكيت على هذا بأكثر تفاصيل هنا ... والسلام 
إقرأ المزيد... Résuméabuiyad