الأربعاء، 16 مارس 2011

أنا خارج عن الموضوع


نمشي في وسط الليل ... مابين الديار العربي ، في مسار طويل ... قطاطس الخرب في الزبلة تشاكس ... نفكر في زهري العاكس ... ويدي في الحيط تخربش ... اسمك في دفاتر ذاكرتي يبربش ... محربش ... بالعو، سكران ... قلبي بيك مليان ... شبعان بالأحزان ... ساعات نتمنى يرجع جيعان ... كيف ما كان فرحان و بروحو شمخان ... اليوم دخل زنقة العميان ... لا نور ولا ألوان ...

يا شمس نحلم تزرق عليا ... تدفيني ، وتوريني الثنية ... تحلي عينية ، يا عزيزة ... وقتاش تطل عليا ... نشوف فيك من بعيد ودموعي على خدودي ... وحشك كرهني في وجودي ... زادو كلاوك جماعة اللائكية ... والخوانجية ... ما خلاو فيك لا ضحكة ولا قعدة مقدية ... الشعب العياش ما حاجتو بيهم ... لقية تجيهم ... وجوه الهم و ريوس اللحم ... نحبو الخدم ... إبعدو علينا تشوفو المساواة ... تشوفو الإحترام للرجال وللبنات ... قلك ديمقراطيات وشريعة ... وزيد كمل عليها فريعة  ... 

يا غالية ... سامحني معاش منجمهم ... نحقرهم ، أما يا نهارت إلي في التركينة نحصرهم ... نربيهم كيفاش يلعبو بيك ... كيفاش في جرتهم الأعداء يشمتو فيك ... يحبو يوسخو هاك الخدود ... أنا على خاطرهم نقيم الجدود ... نخرجهم من اللحود ... مسلمين، مسحين ويهود ... يشهدو على هالدود ... إلي كلاوك وخلاوك عود ممدود ... بلاش فل ولا ياسمين ، شوك كيف القنفود ...     

كرهوني في الكتيبة ... في صباح الخير وفي نكت بية الذيبة ... كان غبرت أعرف إلي متقلق عليك يا غالية ، يا حبيبة ... 

abuiyad

3 تعاليق:

إنسان / Insane يقول...

mezyana minnek caliméro ;)

كاليمارو يقول...

sadi9i chut ... ti winek ?? ghibt 3lina fel facebook

إنسان / Insane يقول...

صديقي كالميرو : برشة من صحابي الفيسبوكين إلي نعزهم برشة ونحترمهم قالولي تعمل في الميلتنتزم باسيف (نضال سلبي ) وقاعد ورا شاشة الحاسوب وماتجيش معانا للشارع وما تساهمش وهوما ناسين إلي حتى وجهي ما يعرفوهوش باش يحكموا ويقولوا أنا ساهمت ولا ما ساهمتش . وأنا حر في طريقة "نضالي " وبرا يا سيدي مانيش مناضل وهاني خيرت ننسحب ونكمل بطريقتي إلي تناسبني من غير كلام مرزي من ناس نقدرهم ومن غير تجريح . سلام صديقي

إرسال تعليق

أعطي رايك