الثلاثاء، 15 فيفري 2011

التونسي ... والكبت الزنسي


أية يا سادة يا مادة ... قلنا السلام وبعد السلام يحلى الكلام ... اليوم مش باش يحلى برشة على خاطر مخي وقف ... إي نعم وقف وتيبلنتا وعمل "فران ساك" ...

تونس دولة المواخير المغلوقة ... هذا الشعار الجديد ... باهي باش نكونو واضحين وضوح الشمس في ضلمة الليل ... لاني مغروم بلمواخير أو ما يعبر عنه بلغتنا العامية البرديل ... ولاني من روادو ... لاني من مشجعي بائعات الهوى ولاني من عاشقي مغامرات ولد الحي في بورديل "نعيمة رزوار" ... أما راني مانيش فاهم ... ومعاش فاهم ... وما عاش نحب نفهم ... فقط نحب نصيح !

تي الزح ... تونس داخلت في حيط ... دولة تكمبزلنا و حكومة تستبله فينا بدم بارد... لا نعرفو وقتاش الإنتخابات ... لا شكون باش يترشح ... لا شنية البرامج متاعهم ... لا شكون ورى التجمع ... لا شكون ورى غياب الأمن ... لا خاممنا في الدستور إلي يلزمو يتبدل لا في عمر بو الزور إلي يلزم ينقص من الإنتهازية متاعو ...

لا ... كيفاش والكلوف لشكون يقعد ؟؟ ... في تونس ما وقفوش للجماعة إلي تسرق في الأراضي وتقسم فيها بصحة الرقعة ... ما شدوش جماعة التجمع وحاسبوهم واحد واحد ... 

التونسي اليوم أحكيلو على ليلى وبن علي كي جابو أولاد في الحرام ... وعماد ولد ما نعرف شكون ... يشيخ في مخو ... يعمل كيف ، ويبدا يصور في أفلام في مخو ... زعمة كيفاش زعبوع ركح ليلي ... وعملو استغفر الله العظيم ...

إلي لاهي يحل في مواقع الإحم إحم ... والصابون مقطوع و رياقنا شايحة ... تي عالقليلة رجعوا كارفور يخدم ... حالة فيكم يا مكابيت !

وجماعة لخرين لاهين يسكرو في المخاور ... وناسيين أنها البلاد بكلها ولات ماخور كبير ... وجماعة اخرين يصيحو عليهم ويشتمو فيهم ... تي هكاك حك راسك سكر ماخور ؟؟ 

يخي البنات إلي غادي عاجبهم الحال ... تي فادين أكثر مني ومنك من المزيريا الكلبة إلي عايشين فيها ... انتي انسان شريف ونظيف كي تحكي على وحدة استر اسمها على القليلة مش توري في بطاقة تعريف بوها ... إتبرعلها بالفلوس و سمعها كلام ربي بالسياسة ... تزيد تكرهك وتكره الدين إلي انتي تحكي بإسمو ...

أنا شخصيا ضد البرديل ... و مشتقاته من الجنسين ... أنا من أجل أن كل مرى تعيش عيشة هانية كيف اندادها وكيف النسا الكل ... من أجل أنها تقرا وتتعلم وتخدم ... لكن تجي تهينها وتسبها ...المرأة كائن حساس ، يجب أن نحكيو معاه بالسياسة وبكل لطف ... مش بالشتم والذم ...

أنا نعرف طفلة أمها "باعتها" ملي عمرها 14 سنة ... شنوا ذنبها ؟ حلت عينها في برديل ... ألا تستحق أن نرفق بها ؟ ... ألا تستحق أن نعطيها خدمة أخرى ؟  ياخي عجبها الحال نهار كامل وهي مستحملت الخمج على أربعة فرنك ؟ 

وفي نفس الوقت برشة "مدافعين عن الحريات" ما قالوش شبينا ما نعاونوش البنات ... همهم هو الخوانجية إلي يسكرو في المواخير ... مشكلتهم هي السيد إلي كتب الله أكبر على باب البرديل ... أما البنية إلي عندها سنين وهي تقاسي ما تلفتلهاش ... مشكلتو أن البرديل تعنيلو "حرية" موش أكبر إهانة إنسانية !
 
هذي مشكلة إجتماعية كبيرة ، ويلزم معالجتها بكل رياض ... 

 باهي هذي حاجة ... أما بربي هذا وقتو ؟ توا وقت البرني والبرديل وليلى رقدت مع فلان وفالتان ؟ 

ما يزيناش ألهم إلي احنا فيه ؟ عباد ميتة بالجوع ، عباد ولادها ماتت بلكرتوش والتونسي همو في شيقول فمي ... باش نبدى نهز ونصبت من العوج إلي الواحد ولى يرقد عليه ويصبح ... تلهاو بالأهم والمهم ... الناس إلي ما عندهاش خدم ... موش بريق البارد والزنود العريانة ... أخطانا من الحكايات بو دورو وخلي نبنيو بلاد على أسس صحيحة ...      

abuiyad

8 تعاليق:

Venus يقول...

excellent comme toujours, espérant que le message parviendra

كاليمارو يقول...

Merki Merki ma chère :-)
je l'espère aussi

وهيبة قويّة يقول...

الكلام في حقّو وفي بلاصتو..الكلّ ولّى يعاون في الناس الأخرى باش الثورة ما تكملش..اللش عملها بقصد نسيناه واللي يعملو فيها بالانسياق والبهامة حاشاكم أكثر وشكون ينجّمهم..المعارضين الكل بالباهي والخايب أثبتوا إفلاسهم السياسي تجاه الثورة، والشعب المسكين التلفزة عملتو مسلسل مكسيكي يتحدث على الفقر والاحتياج...آآآآآآآآه يا وطن.كلّ واحد ينظرلك من ثقب صغير عملو لروحو..وأنا زادة

كاليمارو يقول...

حنين :
مرحبا بيك :)
ااااه يا وطن كيف قلت إنت ... لا عندنا سياسين قادرين على إتخاذ موقف ... لا ناس تعرف شنية الأولويات ... ربي يقدر الخير

fléna bent flén يقول...

فرهدتلي على قلبي !! حاولت نكتب في ها الموضوع طلعلي العصب أكثر ...
اوف منهم !
شكرا كاليمارو

كاليمارو يقول...

فلانة :)
زارتني البركة ... انشالله ديمة نفرهدلك على قلبك يا فلانة يا باهية :)

غير معرف يقول...

Bravo Calimero tu as dit tout ce que je voulais dire là dessus..
Personne ne pense à la réintégration des filles de ces maisons closes, ye3lem rabbi tawa rahom mtaychin fichéra3 ba3delli 3morhom lkoll w dawla testghall fihom :''''(

cactussa يقول...

jai adoré tous ce que tas dit kiko !:)star rabi moch ena niktib wala rahi ****** m3abya larticle !:)

إرسال تعليق

أعطي رايك