الأربعاء، 29 ديسمبر 2010

بكل خرم

خرم يخرم خرمة ومخروم ... كلمة تونسية تعني الشيء فقد معناه أو شرعيته أو مصداقيته بحسب السياق ... بعض الأمثلة :

تو هذا موش خرم ؟؟
إنسان يخرم ...الشخص يولي يهز ويصبت ويقول في كلام لا معنى له ... هذا دليل على الهبال أو تقدم السن ففي كلتا الحالتين مصير كلامه أن يفهم بالمقلوب ... مثال يكون يحب يبكي يولي -كما تقول بعض الفتيات الشقنوسات- كلامك يقققتل بالضحححك يا سخطة ...

إنسان مخروم ... يعني أنه تبلى بمرض الخرمة عفانا وعافاكم الله وأصبح يخرم أو يهذي ... المرض هذا ما عندوش علاقة بالسن بل هو مربوط إما ببنية نفسية هشة (كيف برشة عباد و هذا أمر يؤسفنا) أو بظروف معينة تساعد على تغلغل المرض هذا ... مثال تحس بوحدة كبيرة ، الناس الكل ضدك وحتى إلي معاك هما بيدهم مخرمين ... إحساس غريب نعرف المعالجة متاعو يلزمو راحة كبيرة وخاصةً لا للتنرفيز ...

هالحاجة خرمة ... هذا موش مرض الخرمة انما هذا ما يقال على كلام المخروم أو على مكان تعبا بالمخرومين (كالبرلمان متع برشة دول ) ...

كي يبدا واحد يخرم وتحس إلي هو تخرم وأصبح مخروم مذبيك معاش تسمعو وتدخل هاك الكلام من وذن واطيش عليك الخرم من الوذن الأخرى ... وتقول الكلام هذا خرمة أخطاني منو لا نتخرم ... هده الإسعافات الأولية في إنتظار يجي طبيب يفهملها ويعطيك الوصفة السحرية  حتى ما تتخرمش ...

ولذلك انا البارح استمعت بكل حزم لطبيبي الشافي ...طبيب الأمة ... قاهر العذارى رافع التحديات وفيقني باش ماعادش نسمع برشة خرم ... ما نطولش عليكم هو أش قالي :

إسمع يا ولدي :

 جماعة متع الفيسبوك يحكيو... بكل خرم 
الجزيرة تيفي تحكي على بلادنا... بكل خرم 
مصادر مش موثوقة ... بكلي خرم
صحافة حرة و عمار 404 ... بكلي خرم
الإنتحار والحرايق من جرت البطالة ... بكلي خرم
فقر ونفسية هشة ... بكلي خرم
الإنتفاضة والتهويل ... بكلي خرم 
النقابات والمحامين في الشوارع ؟ ... بكلي خرم 
المعارضة ؟ هههه ... بكلي خرم 
البوليسية إلي تكسر في الخلق ... بكلي خرم 
الصورة إلي عاطينها على بلادنا ... بكلي خرم 
أنا ما على بالي بكم وما نحب كان روحي ... بكلي خرم 
التليفونات إلي ترن ... بكلي خرم 
السبعة دقايق إلي خسرتهم معاك ... بكلي خرم ... بكل خرم 

إقرأ المزيد... Résuméabuiyad

الثلاثاء، 28 ديسمبر 2010

عمار يستفيق من سباته الشتوي

عمار صاحب ميدالية الموظف المثالي لسنة 2010 ... بدا تقريبا نهار الخميس إلي فات في حملة زنسفورية جديدة على بعض الصفحات والبروفيلات في الفيسبوك ومنهم صفحتي إلي بصراحة ما فهمتش علاش جزرها (الله لا تبركلك ... هذاك اش انجم نقلك) ...  

اه تفكرت على خاطر حطيت رابط لصفحة مشبوهة ... وفيها استقواء بالأجنبي ... أو في رواية أخرى قلت كليمة حق !

إي عادة قلك انتم يا مدونين ويا فسبوكيين تكرهوا تونس و تعطيو في صورة مزفتة للبلاد إلي ريحتها ورد وياسمين (يابا يابا)... قاعدين تكذبو فالمعجزة الإقتصادية إلي يشهدلنا عليها العالم الكل ... وتبكيو على مجرد ١٩ فاصل تفتوفة بالميا بطالة (فقط) ... انتم يا وجوه اللوح (يا إلي ما عاش تفيد فيكم لغة الخشب) ما تعرفوا حتى شيء، نهار وطولو وراء "اكرن" و تحكيو على حال المدن الفقيرة ... 

إمشيو عيشو فيها وها تو تشوفو الإنجازات ورفع التحديات ... وتو تشوفو شعب زاهي وأمورو عال العال ... الشعب من كثر حبه للحياة أصبح يعمل في أنشطة ثقافية في المدينة كمحاولة إنارة شوارع البلاد بتشعيل بدنو وإلا السباحة في بئر أو محاولة التسلق في أسلاك الضوء أو حتى محاولة التصدي للكرتوش ببدنو ... صحيح انو شعب "ساديك" نوعا ما أما راهو كل واحد وسكرتوعلاش تجيه ...

هاو حتى المعارضين إلي في مجلس النواب قالو إلي انتم متأثرين بالجزيرة تيفي (إلي كيما تجيب في معارضين تجيب في سي بصيص)  وناويين على خلاها ... لذا باش ما تفزدوش العلاقات الحميمية بن السلطة والشعب ... وباش ما تقلقوش حراس المناصب عفواً المكاسب في مسيرتهم المباركة نحو تغميض أعين الناس ... قررنا نحن المجلس الأعلى للمراقبة الهنترنتية أن نرفع تشكياتنا إلى حبيبتنا أمريكا إلي كالعادة من أجل إرساء الديمقراطية البنفسجية إستجابة لطلبنا باستعمال المبيد التدويني الى وهو صبع عمار عفواً مقص عمار (ما تنساوش إلي سامحناها (أمريكا) على وكليكس ...ومن باب رد الجميل يلزمها تستجيب) ...

أية إن شاء الله تكونو فهمتو رواحكم ... اطلبو السماح من بلادكم راكم حشمتوها قدام شعوب العالم (حتى من زامبيا حكات عليكم ... زعمة نكونو أول بلاد تصنصر موقع زامبي ؟؟ )  !

أية توا خليونا إنركزو ويزيو بلا همجية ... خلينا نعديو ألسنة الدولية للشباب على خير...

La censure nuit gravement à l'image de ma Tunisie (imbéciles)


إقرأ المزيد... Résuméabuiyad

السبت، 25 ديسمبر 2010

أيام زمان : الحلقة الأولى

اليوم قاعد قدام حاسوب ويتفرج في فديوات وحالل الفيسبوك يحكي مع الأحبيبات ... 

وحدو في بيت ... يطيب، يغسل حوايجه، ينظف ... قايم بكل ما لازمو ... مغروم بتبديل "الديكور" بالنسبة ليه تبديلو هو عبارة على نفس جديد ... أمل جديد ... روح جديدة ... حياة جديدة ...

يخرج الصباح بكري وما يرجع كان بعد الثمنية ... يطيب ، يقرأ شوية ، يرقد وهكذا دواليك ... ساعات يتسائل هل أن الحياة هذي عندها معنى ... هل أن الوحدة هذي عندها نهاية ... هل أن أصدقاؤه إلي عرفهم الكل مازالو يتذكروه ويتذكرو هبالو ... يتذكرو العركات إلي بالحجر فالحومة ... زعمة مازلت تتذكرو هي ... شنوا يعنيلها اليوم ... هل يجي نهار ويشوفها ؟؟

حب يهرب من الأسئلة هذي الكل ... اسئلة في نهاية الأمر تحرجو ولو انو قاعد وحدو ... تحرجو على خاطر ديمة يتسائلهم وما لقاش جواب ... يحس في روحو عاجز عن التفكير !

عاجز عن التفكير كيف ما عاجز عن إسترجاع أجمل لحظات في حياتو ... أجهد نفسو في التخيل لكن ما قدرش يرسم الصورة متاعه وقت إلي تكلم أول مرة ... ما نجمش يرسم البسمة إلي في وجه امو وهي تسمع فيه ينطق في حروف عندها معنى ... فرحة كبيرة كأي أم تكون خايفة أن ولدها لن ينطق ... كان نطق متأخر نسبيا لكن أول كلمة كان قالها هي "الله" ... يتمنى اليوم أنها تكون أخر كلمة ... كي قالها امو بكات وهزتو تجري لراجلها فرحانة به ...

عاجز أن يتذكر أول خطوة عملها... كيفاش تغلب على الجاذبية الأرضية ونجم يهز ساقو من على الأرض ... كيفاش نجم يقدم ساقه ويخدم العضلات إلي في فخذو ... العضلات هذي إلي لطالما خانته في ما قبل ... لكن هاهي اليوم تمنح له نوع جديد من أنواع الحرية ... أصبح قادر على أن يتقدم، أن يمضي حيث يريد ... أن يلتحق بأمه إلي واقفة قدامه تصفقلو وتنادي عليه أن يأتي في حضنها ... لم يعد في حاجة إلى البكاء حتى يحملوه حيث يبغي ... لن يضعوه مجددا في تلك العربة أين يشدو وثاقة ويقوده حيث أرادو ... فاليوم أصبح حر وقادر على الهروب لما يحملوه لذاك الرجل الذي يلبس الأبيض ... الشرير إلي كل مرة يوجعو بالإبرة ويخليه يبكي سوايع وسوايع ...




هذا الكل كان "فلو" ... هو فقط يحاول أن يرسم كل هذه اللحظات إلي للأسف ما قعدتش في ذاكرتو ولكن حكاتلو عليهم امو وكان ديمة يقولها عاودلي ... خاصةً الليلة إلي اكتشفوا انو عندو حساسية من الصوف وتقطع عليه النفس ... كانت الأربعة متاع الصباح ... بوه صابح يخدم ولكن هذي هي المسؤولية إلي ديمة يحكيولو عليها كي كان صغير ... خرجوا في ليلة ممطرة من ليالي جانفي ...

الدنيا باردة وكل شيء مغلق ... ما كانش عندهم سيارة لأنو تولد في مدينة صغيرة يعيش أكثر اهاليها من الفلاحة والملاحة وكانو بفلوسهم يشريو "البلنسيات" أو "التراكتورات" ... تلز بوه أن يلفو في كسيلة ويضمو لصدرو ويجري به إلى دار الطبيب ... المدينة كانو ناسها الكل طيبين ... كانو ناس تحب الخير لبعضها ... الكل يعرف الكل ... خرج الطبيب وطمن امو بعد ما دقلو إبرة سرحتلو النفس ودورة فيه الدم ... أما كالعادة زادت كرهتو في كل من يلبس الأبيض وعندو صنطات في وذنيه ...

حاول يتذكر كيفاش كان يرقد ... كيفاش كان يفيق ... يحب يعرف شنوا إلي كان يضحكو وشنوا كان يبكيه ... يحب يفهم كيفاش كانو يعرفوه مريض ، جيعان، عطشان ، أو عاملها على روحو ... هذي الكل كانت حاجات يسمع بها ويشوفها في 4 تصيورات إلي صوروهملو ... ما كانش عندهم "كامسكوب" باش يسجلو بالصوت والصورة عيد ميلاده الأول والأخير ... في تصويرة فيها شمعة كبيرة وهو ينفخ عليها ... شمعة في وسط خبزة "جاتو" ما يتذكرش انو كلا منها أما قالولو إلي كان حط زوز يديه في وسطها ... عندو تصويرة أخرى مازال يحتفض بها ... هو يضحك وراكب على أكتاف بوه ... اليوم كي يشوفها يفهم ويتذكر التضحيات إلي عملهم بوه باش قراه ... التضحيات باش لبسو وباش وباش ... هل أنه يجي يوم ويرد الإعتبار ؟

مازال يجهد في ذاكرته ... يحب يعرف شنية أول حاجة رسخت في مخيلتو ... فين ذاكرته أصبحت "نون فولاتيل" .. يتذكر انو قبل كان ديمة يسمع كاسات امو سجلتلو فيها اناشيد متاع الصور المتحركة من التلفزة ... كان فيها نعمان والحرف الأبجدية وبرشة اناشيد اخرين فيهم إلي كان يعجبوه ويعمل عليهم كيف وفيهم إلي جعلوه نهار يهز المسجلة وينفضها فالقاع ومن بعد قام يبكي ... كان يسمع الاناشيد وتلقاه يتهز ويتنفض وحدو ... 


يتذكر انو كان يسمع وحدة ... اسمها لتو في ذاكرتو "ريم البندلي" و كذلك كان مغروم "بالريغي" و"ألفا بلوندي" ...أما أكثر نشيد يتذكرو هو "ماما زمنها جاية" ... كان يسمعو في برشة بلايص موش في دارهم فقط أما الحاجة المؤكدة ماهو فاهم منها حتى حرف ...


ما يتذكرش بالضبط قداش كان عمرو في الفترة هذيك ... ما بين العامين والثلاثة نتصور ...يتذكر زادة انو كانو ديمة يعسو عليه وفين يحب يكتشف حاجة جديدة ويحطها في فمو تجي امو وتشويه على يدو وتقولو "لحة نحي من فمك" ... كان فين يطلع على الكرسي بعد جهد وعناء لا يوصف ويبدا يشوف في الكيسان إلي على الطاولة ويتسائل "زعمة يتاكلو ؟" ... وفي اللحظة إلي يمد يدو باش يهز يجيه بوه يدغدغو ويهزو ... 

هو توا يتذكر أما مش عارف هل أن هاذم في ذاكرتو بالحق وعاشهم أم انو الخيال متاعو سمحلو باش يرسم اللحظات إلي كان يشوف فيها نفسو وهو صغير ... 

يتذكر انو سكن في دار عربي ... كانو والديه عرايس جدد جابوه مباشرة بعد العرس على خاطر في مدينتو ألي يفوتو النصف العام ومغير ما تحبل المرأة عيب كبير وتبدى القيل والقال ... جاء وبوه مازال يعاني في مصروف العرس مازال ما كونش باش يبني الدار ... كانو في دار عزيزو الله يرحمو ... في بيت صغيرة ... وزادة عندهم جيران حتى هما في نفس الوضعية ... كي كبر شوية عرف إلي هذوكم عموماتو والبنات إلي كان متمرد عليهم بنات عموماتو ... كان أكبر ذكر في الأحفاد ما خلاه يحتل منصب يحسد عليه ... كان  مقرب من الجميع ... وإلى يومنا هذا الكل يكنولو إحترام كبير لأنو برغم تغير الدنيا وصعب المعيشة مازال ما نساش هاك الأيمات ... 

لكن الحاجة إلي يتذكرها مليح وعمرو ما ينساها هي ... 

يتبع 
     
إقرأ المزيد... Résuméabuiyad

الثلاثاء، 21 ديسمبر 2010

"نونية" مواطن مجروح


يا بلادي والله كويتينا  
من الفقر والبطالة قتلتينا
العالم كلو يسخر بينا 
والجزيرة تيفي تضحك علينا 
يا حكومة بالله أعتقينا
وكرامتنا وحقوقنا امنحينا
من السرقات رانا ملينا
ومن العيشة المرة ... النار شعلة فينا
ويا تلفزة كفاك ما كذبت علينا
نحن شعب ذكي ... صدقينا
كذبك يخنق فينا ...
فكينا راكي مرجتينا
يا ضالم ... هتكت حاضرنا وماضينا
من طلعتك الخشبية تبرينا
بالكرة والمزويد عرفت كيفاش تلهينا
وبالأماني والتحسينات صبرتينا
وعودك اليوم لم تعد تكفينا
نريد مستقبل يغرينا
لا الحرقة التي صارت تنجينا
و كلابك إلتي تنهب فينا
الموت أصبح أرحم بينا
يا بلادي راكي شويتينا
يا بلادي علاش تعذب فينا
من أجلك إنت ضحينا
وصبرنا علي من يخون فينا
وإلي يهز القفة بينا
يا تونس ... من حبك ما برينا
ضمينا وأحبينا ... فلا أحد غيرك يشفينا 

   
     
إقرأ المزيد... Résuméabuiyad

الأحد، 19 ديسمبر 2010

قصة ميغالو و بنفسجيست ... الجزء الرابع والأخير

بعد ما خرج بنفسجيست ساقيه أعلى من راسو والمرى متاعو تجري وراه بال"تالون" وفحجة لباس والفحجة إلي من بعد ساقها تتلوى ... وكل مرة تصيح على راجلها أن ينتظرها ولكنو عامل مولى الدار مش هوني ... يجري ويبرطع وهاك الفليجة إلي وراه مع كل حجرة تترفع تقول بش اطير بيه ولكن عزمو على الخلوط فالوقت جعلو يكبش فيها ...

وصل للمطار وتفاجأ بعدد الحنوشة والثعالب إلي كانت في إستقبالو ... لكن فيسع ما تفكر إلي الملك مسافر وهذي حاجة عادية ...
تقابل بنفسجيست مع الثعلب إلي كان وعدو باش يجيبلو جواز السفر ...

- صباح الخير ...
- صباح الفل ... لباس ؟ شنوة عجبك العرس ؟؟ هههه 
- هههه (ضحكة برتقالية) ... إي إي 
- أية هاو الجواز إلي وعدتك به 
- الله الله عليك ... إلي يعول يعول على راجل (صحة لك استنى نخرج بركة)
- تي  ويني المدام ؟ موش ماشية معاك ؟

هكاكة ودخلت مرتو تعڨل ... مشى حذاها وعطاها الجواز حطتو "فالصاك" متاعها .. وقعدو يوتوتو مع بعضهم في إنتظار الركب الملكي ...  بعد نصف ساعة أو أكثر شوية جاء ميغالو الملك ودخل معاه عدد كبير من الحنوشة والثعالب وبطبيعة الحال اللبوة كنت معاه "برادسي برادسو" ... سلمو على بنفسجيست ومرتو وباركولهم بالعرس وأكثر من هذا وعدوهم بدار مجهزة في كندا كهدية العرس ... فرحو العرايس الجدد خاصةً مرة بنفسجيست إلي كانت ياسر متخوفة من المغامرة ... دخلو الجماعة للمطار وعطاو الفليجات لثعلب منهم باش يهزهم للطيارة ...

ومشى ميغالو وبنفسجيست و زوز نساهم إلى مكان الإستقبال الملكي ... هي عبارة على صالون كبير بكلو رخام من جميع الألوان ومعبي بالأثار الأصيلة ... طلب ميغالو من زوجتو أن تمشي تعمل دورة بمرة بنفسجيست على حافة "ألبيسين"  إلي في الصالون ..

- شوف هذي تحفة من غابة يسميوها الصين ... هذي تسوى قرابة 500 شهرية متع أستاذ أما بربي لواه الخساير شعندو يعمل بها الشهرية 5 الأف فالجمعة تكفيه ...


- ملة ... صحة لك راجلك يشريلك إلي تحب ...
- ها ها ... ياخي هو يقرر وأنا موجودة ؟؟ يحمد ربي كي مزلت ما سيبتش عليه سيدي خويا ياكلو حي ...إسمع الراجل يلزمو كالخاتم في صبعك ما كانش اش قام عليك تعرس  ... 

حاصل دخلو في هاك الحكايات متع النساء ... راجلك باهي معاك وأعملو هك وما تعملش هك وكيفاش وعلاش وفلان وفالتان (بذكر التقطيع والترييش البارح زميلة سابقا وراتني تصويرة متاعها على الفيسبوك تحتها تعليق "الجاذبية البشرية أقوى بكثير من الجاذبية الأرضية" ها ها ها) ... 

وفي نفس الوقت مد ميغالو ماصو لبنفسجيست وطلب منو أن يحلو ... بنفسجيست كيف شد الماصو وفرح قبل ما يحلو كان يتوقع أن باش يلقى العقد متع الدار إلي وعدو بها ... حل الجواب وجبد الأوراق إلي في وسطو ... بدات يديه ترتعد ... بدا يحس في سخانة تخنق فيه والفجعة إلي كلاها الله لا يذوقها لحبيب ... حب يهز عينيه ويتكلم إلى أن جميع حواسه خانتو ... تلفت لمرتو يلقاها تضحك مع اللبوة الكبيرة حب يعيطلها ... حب يفسرلها ... حب يضرب ميغالو ويهرب لكن قبل ما يعمل حتى شي نط أحد الأحناش وعلق له حزام ناسف وعبالو جيابو بجميع أنواع المخدرات والممنوعات وصاح فيه ثعلب وصاح معاه ميغالو وتم في رمشة عين إلقاء القبض عليه ... حاولت زوجتو أن تطلب رحمة ميغالو لكنو رفض وتم حمل بنفسجيست على وجه السرعة إلى التحقيق في التخطيط  لعملية إرهاب والثلب وتهريب مخدرات والتحضير لإغتيال الملك ... 

قبل ما يخرج بنفسجيست تلوحت عليه مرتو تحب تمشي معاه إلا أن الملك منعها وجرها معه إلى الطائرة ... وهي تصيح وتبكي ... طلعو في الطيارة و اقلعوا ... بنفسجيست وصل للمركز ويلقى قدامو الأحناش فرحة بإستقبالو ... 
في الطيارة كانت مرة بنفسجيست انعزلت على كرسي وحدها ... تتفرج من الشباك وتفكر في الإنتحار ... كانت تذكرت زواجها المتعجل  ومعرفتها وثقتها ببنفسجيست أنه على حق جعلها تلعن الشيطان وتحاول تدارك الموقف وتصلح إلي تنجم ... حطت يدها في جيبها وإذا بها تلقى وراق ... جبدتهم ... تصاورها هي ورجلها في القهوة إلي كانوا تقابلوا فيها وحكاو على العرس ... وبدات تحاول تفهم شكون صورها وكيفاش وصلو التصاور لجيبها إلا أن كثرة الأحداث جعلها حايرة وما فاهمة حتى شيء ...

بنفسجيست حكم عليه 25 سنة ومرتو قعدت تناضل وتنادي بحق رجلها وبإنشاء جمهورية ... تعمل في فيديوات وتحط فيهم على الفيسبوك ... الناس تتفرج وتحط "جام" ولا واحد معبرها حتى واحد لا نجم يعطيها حل للغز إلي خلاهولها رجلها ...

في زنزانة وحدو دنيا ضلام يوصلو الحديث على مرتو ... جاء بوها و سمعو الكلام ... كلمة ألحق إلي قالها في وجه الظلم تكلفتلو غالية ... السلاسل في يديه وساقيه ما يحكي مع حتى حد وحتى حد لا يحكي معاه ... حتى نهار جابولو ورقة ...

تم إغتيال زوجته في كندا ...بكى برشة ولكن لا حيلة له ... مزق الورقة الحاملة لأقسى خبر سمعه منذ أن عارفها  ... مزق معها كل أمل في حياة أفضل ...

نعم مزقها ودخل الزنزانة ... دخلها ولم تعد له رغبة فالخروج منها ... فالسجن أرحم به من غدر الأصدقاء ... ماتت من ضحت معه ومات نضالها وماتت حرية التعبير ... مات العالم والمتعلم وبقي اللئيم في شأن القوم يتكلم ... دخل إلي زنزانة مظلمة ... كان قد رسم على جدرانها اسمها ... 

*
يداعب في الجدران بأصابعه الضعيفة المرتعدة ...  و عقلو قد سافر في ذاك العالم المجهول ... في ما لاقت زوجته اثر الممات أهي تنعم في جنات ؟ ... في زنزانة مظلمة يخاطبها ويطلب منها أن  تسامحه ... لاقت يده لبنة سحرية  من لبنات الزنزانة ... فتحت له مفراً من ذاك السجن ... وجد نفسه يحدث زوجته ويداعبها في ضل نخله تدلت ثمارها ... فيقطف من تمرها الذي إن لامسته تحول إلى عنب ذهبي اللون حلو المذاق ... فتأكل من يديه وتهمس له في أذنه كلمات ليست كالكلمات ... فيطير نشوة ويطير حلمه وقت إلي هبطت عليه متراك ...

- تڨعد  ... شفت روحك فين راقد ؟؟

ثار بنفسجيست وهرب بالمتراك من يد الحنش وطاح يضرب يضرب يضرب ...

مات الحنش ...

وأعدم بنفسجيست ...  وقبل الإعدام قال كما قال الشاعر و هو ينظر في عينا ميغالو :

إن الملوك بـلاء حيثما حـلـوا * فلا يكن لك في أبوابهم ظــل
ماذا تؤمل من قوم إذا غضبـوا * جاروا عليك وإن أرضيتهم ملوا
فاستعن بالله عن أبوابهم كرمـا * إن الوقوف على أبوابهــم ذل 
* الفقرة الأخيرة مستوحاة من تبادل تعاليق مع المدونة الصديقة أجندة ... كانت عبارة على خاتمة تخيلناها لقصة حلوة وحكاتها هي بطريقة ياسر ممتعة ... وكذلك الأبيات كانو من إقتراح أجندة ... مشكورة
  
إقرأ المزيد... Résuméabuiyad

الجمعة، 17 ديسمبر 2010

بلاد زبالة

بالرسمي دولة الأمن والأمان ... بلاد تكسير جلغت الإنسان وقصان اللسان ...

أية سيدي مانيش مطول فقط نحب نعدي المعلومة إلى متتبعين المدونة على خاطر وصلنا لحالة تبكي دم و مازلنا اناشدو ونصفقو لمنتصر إلي خرجوه مالقش (تقول ماوكلي) ... للأمانة التعليق والفيديو إلي التحت منقولين ملفسبوك أنا ما عند ما نزيد أكثر من هكا :   
صاحب شهادة وتاجر متجول يحرق نفسه امام الولاية محمد بوعزيزي مجاز اضطرته البطالة إلى العمل في مجال التجارة المتجولة (بيع الخضر والغلال ) ، و قد اتصل به عون تراتيب و أعلمه بعدم قانونية نشاطه و أراد حجز البضاعة التي كانت لديه و لما مانع محمد اعتدى عليه عون التراتيب بالعنف فتحول محمد إلى الولاية لشكوى و الاحتجاج لكن الولاية أوصدت أبوابها دونه و في لحظة تأثر قصوى أضرم النار في جسده وقد فارق الحياة متاثرا بحروقه البليغة علما ان الولاية الآن تشهد حركة احتجاجبة كبيرة حيث بادر زملاء محمد إلى رشق مركزالولاية بما كانوا يبيعونه من خضر و غلال



 يا جماعة التلفزة أية ماو صحافة مستقلة أية أحكيو على الموضوع هذا ... جيبو امو في عندي ما نقلك وجبولها الوالي خلي تكبلو سعدو 
إقرأ المزيد... Résuméabuiyad

الخميس، 16 ديسمبر 2010

الأذان و البرلمان

اليوم عالفيسبوك فيديو "شوك" لبرشة توانسة وفيها مستشارة تحكي على تخفيض صوت الأذان ...


باهي ...  قريت برشة أراء فالحكاية هذي فيها الإنتهازية وفيها إلي جاية من صميم القلب (سوى مساندين أو معارضين) ...

يقول القايل القانون فوق الجميع ولا بد من تطبيقو وهو أن الصوت متاع الأذان يجب أن لا يتجاوز 70 ديسيبال (وحدة قيس الصوت) ... لكن 70 ديسيبال تساوي - بش نقربلكم الصورة - حسب التقريب صوت التليفون أو صوت التلفاز ... نعطيكم رقم أخر صوت الزمارة متع السيارة بين 80 و90 ديسيبل ... يعني شوف المؤذن يسمع صوتو ولا ...

يا أخي فما تشكيات ؟؟ باهي نحدو عدد (مثال 5 ) ... وقت نوصلو للعدد هذا من الجيران إلي مقلقهم الأذان ... البلدية تفرض على الجامع انو يخفض من الصوت ...
جامع بحذاه سبيتار ؟؟ مش مشكلة ينقص من الصوت ويضهرلي أكثرية الجوامع كان موش الكل بعاد جغرفياً عن السبيطرات 
إلي نحب نقولو انو كنا بشوية ذكاء وخاصةً برشة موضوعية نخرجو من الحكاية سلامات !!

المرأة إلي تتكلم بإسمي واسمك ... شكون حطها غادي ؟؟ هل انو الشعب إلي إنتخابها ؟؟ 

فما برشة عباد فقدت موضوعيتها وفرحت بالحكاية ولو أنهم نهار وطولو موش عاجبهم "السيستام" وخاصةً مستعرفين انو إلي في البرلمان والمستشارين وغيرهم ما يمثلوش الشعب ... أو انو من مبدئ "حدثني في ما نحب ولو حتى بالكذب " ؟   

فما شكون حكى على أصول الإسلام وإلي الأذان ما كانش بالبوق ... حسب معلوماتي الإسلام عمرو ما حدد طريقة اشهار الأذان ! 

والأنسة أو السيدة هذي كانت تنجم تطرح مسألة الكلام الزايد إلي تقلق الكبير والصغير ... أو انو ما قلقهاش صوت البومزيود إلي في العراس يعديلك ليلة لا يرقد ولا يخليك ترقد ؟؟ (مع احتراماتي لكل من يسمعلو ومنهم شخصي المتواضع في بعض الحالات المأساوية إلي نتعدى عليها)  ...

نحب نذكر انو تونس دينها الاسلام حب من حب وكره من كره والأذان تابع الإسلام كيف كيف إلي حب مرحبا وإلي ما عجبوش يركب "دوبل فيتراج " ... وهذا ينجم يعود بالمنفعة على إقتصاد البلاد الفالسة ...

اه نسيت إلي حساس برشة والجامع إلي بحذاه باقي "يرعب فيه"  ... ما عليه كان يتسلح بالاختراع العظيم إلي في الصورة أسفله  

إقرأ المزيد... Résuméabuiyad

الأربعاء، 15 ديسمبر 2010

عوج فايسبوكي

بصراحة موضوع اليوم كان باش نحل فيه باب على المدونة توا في ضرف أسبوع  نطيح "الركورد" في عدد التدوينات ... موضوع العوج إلي موجود في كتاب الكشخ (الملقب بالفايس بوك)  والبهامة المصطنعة أو العفوية كانت ديمة  تركبلي شوية سكر على شوية عظم عربي  ... لكن بحكم أني ما نلومش على الشباب "الضايع"  و ما نحبش نلوم عليهم (لأسباب متعدة) ... نخير نوجه لومي لاصحاب القرار (كيف فالتدوينات إلي سبقو الكل) بكلماتي وعباراتي ولغتي الخشبية الزنسفورية ... وزيد على هذا المدونين إلي يتناولو المواضيع هذي موجودين بكثرة لذا هاني نخرفلكم في حكايات أخرى ... على كل حال ...

أية سيدك صبحت صباح الخير ليوم ... نحل "عفيون العرب الأزرق " ونعمل دورتي اليومية على صفحاتي المحبذة و نعمل طلة على صفحتي السخصية (هنا)  ونصبح على عباد الله ... 

في "فان بايج" من إلي دخلتلهم لقيت واحد حاطت  تعليق فيه واصل متاع صفحة أخرى (هنا) ... المحتوى ما فاجئنيش ... مستوى أكثرية الصفحات  إلي نشوفوهم في تونس ... ضريبة محمد حسان ويوم القيامة وبعدها ضريبة شراب وألعاب ... لا علينا  هما قبل كل شيء أحرار وزيد انو المحتوى العشوائي (إلي حلا في عينيك "برتاجيه") حاجة والفت بها وتفسر تذبذب فكر الشباب اليوم إلي معاش عارف لوين يشب ... 

في تعريف الصفحة (على اليمين) نلقى حاطين "ليسته" متاع الولايات التونسية ... والغاية ورى هذا ما نعرفهاش ولكن في الوهلة الأولى قلت ما يكونو كان يحبو يوريو إلي هما يلمو في الجماعة الكل دون تفريق بين الولايات ... لكن سامحوني فالكلمة كي انتم بهايم (أي نعم بهايم وهو تو نقلك علاش) اش لز حمة يغني ؟؟




ما نعرف يمكن أنا عينيا مالنوم أو يلزمني "لونات" قعر دبوزة ... أما ما شفتش بنزرت !! (يمكن برشة عباد تعتبرها حكاية فارغة أما أنا وجعتني لأني من أنصار المساواة بين الجهات في كل شي ... حتى على حيط فسبوكي مستواه صفر) ...
هل انو مجرد نسوة ؟؟ في الحالة هذي كي تعرف إلي بهامتك تحضر وتغيب ما تتفافاش على مخك ...
قلت يمكن زادة كتبو وهو في حالة سكر وهو في إحدى النزل في بنزرت ونسا هو فين ... ممكن ؟!
حالة الاخرى وهي إلي نستغربها وما نستغرباهش ... النسيان هذا كان وراه سوء نية (ولو أني ما نتصورش أنها حالة واردة) ... يمكن زادة ما يعتبروش بنزرت في تونس ؟؟ 

على كل مذبية لو كان الغلطة هذي تتصلح ... على خاطر بنزرت بلاش تونس ما تسوى شيء وتونس بلاش بنزرت كمجاهد بلاش سلاح ... 

ملاحظة ثانية على الفيسبوك وهي حكاية عندها مدة مارجتني ...الدعوات للصفحات جايين من كل حدب وصوب ... حويجة باهية ؟؟ 
لا ... كان باش تقلي اجا ضد أو باش نساند أو من أجل سحب جنسية أو صفحة فيها كلام زايد وشتم لأي شخص كن لونو عرقو أو معتقداته(إلا في حالة تكون مزحة كيف صفحة "عم صالح" أو "معز الصوابني") ... لأني بكل بساطة ما يهمني في حتى حد عندي معتقداتي وقناعاتي ... وأول حاجة نأمن بها هي "إنت حر ما دمت لم تتعدى على حريتي" (هاني راجعلها)  !

علاش نحكيلكم في قصة حياتي مع الصفحات الفسبوكية ؟؟ 
على خاطر حتى الحكاية هذي نحب نقلها "سيب صالح" ...على خاطر يا ناس يزيونا من لغة هذا بيه وهذا عليه ... إنت زنديق وعميل وكافر ... وانتي إرهابي ووهابي متطرف ... 
خليونا نشوفو حل للبلاد فماش ما نهار نعيشو فيها كالناس ... ونعيشو بإختلافاتنا ونحترمو الناس الكل كأناس  ...  مش لازم نزيدو نتفرقو أكثر ملي احنا فيه ... والله ساعات نقول يرزينا فيه الفسبوك !! أما الله غالب "مارك زوكربرج" علمهولنا ووحل فينا ...  قلك باش يدخل 10 خدامة يتلهاو بحكاية "سينيالي" إلي ابدعنا فيها (بطبيعة مش بالحق أما "البروجرام" إلي عاملينو للغرض راهو كفر بريحة التوانسة والمرج متاعهم) !


ملاحظة ثالثة ضلامية برشة في أعين بعض الناس ... لكن هامة بنسبة لشخصي المتواضع ...  اليوم زادة - نهار مبروك - صبحت على تعليق واحد بنفسجي ملبريمة مانيش باش نحط اسمو على خاطر تتوسخ المدونة متاعي ... السيد يحكي على حجاب المرأة -بنفسجيست رجعي ووهابي مطرف من النوع الرفيع- ... عادة قلك في إحدى الصفحات متاع وحدة تعرفوها الكل ... كيف كيف ما نحبش نسميها (ملاحظة ما عندي حتى مشكلة معاها) ... إلي "تحب تلبس تلبس سفساري أبيض وإلا ملحفة تونسية أنا لا اعتبر ذلك لباسا طائفيا ، اللباس الطائفي هو الخمار الأسود الإيراني خاصة " ... مانيش باش نحكي على شرعية الحجاب أو غيرو ... انما قاعد باهت في ناس تدعي الحرية والعلم وهي ما فاهمة شيء ... كيفاش تمشي تقرا بلسفساري ؟ ويا سيدي شبيك انتي تلبس سروال جاي من البرة علاش هي تحب تحسرلها لبستها في سفساري أبيض (ردو بالكم السفساري إلي عاطي علصفورية لا ) ... ؟ هذي الحرية إلي تدعيلها سيادتك ؟؟

ومرة أخرى يا ناس يزيو من تحويل الحكايات ... تونس ماهيش افغنستان أو الجزاير أو غيرهم ! أخر كلمة للسيد إلي نتمنى انو يقرا كلامي ... ويفهم انو الفرق بني وبينو هو أني نعطي لمرتي لجارتي لختي لأمي حرية أنها تختار إلي تحب وتلبس كيف هي تحب وهو لا ...
و يمكن ياسرهذي أخر مرة نحكي فيها في موضوع يخص الفيسبوك ... 

أخير  نتوجه بكلمة لغيغوز ونقلها حضرلي هاك السلسلة هاو غدوة عاشوراء ...  
   
     
إقرأ المزيد... Résuméabuiyad

الثلاثاء، 14 ديسمبر 2010

قصة ميغالو و بنفسجيست ... الجزء الثالث

صاح ميغالو في ذئابه وطلب منهم حل وثاق بنفسجيست بالتو ... حاول الثعالب إقناعو بالخطر إلي يحدق بهم لو سمعو بنفسجيست يحكي ويعبر على خاطرو ما خلا حتى حيوان رايض (صحيح ما حكاش برشة عاللبوة أما من باب التقدير لصديقو ميغالو لا أكثر و لا أقل) ...

لكن ميغالو كان مصر على قرارو و هددهم بالويل  لو ما يسيبوهش بالوقت ... فأمر الثعلب الحنوشة أنهم يسيبو بنفسجيست و يهزو سلاسلهم ودبابزهم ويغادرو المكان ... 

تسيب بنفسجيست ... وقعد قرابة نصف ساعة وهو يسترجع في أنفاسو من جراء المعاملة الوحشية إلي تلقاها ... وكان الثعلب الكبير يغزرلو وكأنو يحب يقلو يا أنا يا إنت ... تو نتفاهمو فيها !

وخرج الثعلب وقعد بنفسجيست وميغالو راس راس ... ميغالو :

- ناويلي عالشر سي الشباب ؟

- ورحمة لعزوزة لا ...  مش قتلي عندك فيا الثقة ؟ فقط حبيت نعطي رأيي ... مانيش سياسي أو حاجتي بكرسي ... أما كي شفت العوج حبيت نتكلم ... وبش نتكلم !

- شوف المرة هذي تعداتلك ... على خاطر العشرة إلي بناتنا ... ما ننساش الايامات إلي كنت نجي للستوديو عندك ونقعد انا والفرخة وقتها ... مانيش بش ننسى وقفتك معايا وقت كنت تعديلي في الإمتحانات ونعرف كان مش انتي راني عمرني ما خذيت الباك ... 
هذاك علاش المرة هذي بش نشفع فيك أما على شرط ...

- بش تقلي أسكت و تبدى تحاصر فيا في كل ثنية و ذيوبتك تعس ... كان تسدت تو نحل بلوغ ...

- هههه ... ما كملتش ... عندك في يدك ثلاثة أيام بش تقلب وجهك من الغابة هذي ... إختار غابة أخرى وأنا نخلصلك الرحلة وتوا واحد من الثعالب إلي معايا يجبلك جواز السفر الديبلوماسي ... وكي توصل غادي تعملي حساب بنكي بش نخبي فيهم فلوسي (على ما يواتي) ويطمئن قلبي ...

- تنفيني ؟؟ 


- وكان ناوي على مشروع عرس ازرب روحك ... هاك شاك متاع زوز ملاين عاون بهم روحك ... نعرف ماهيش حكاية ساهلة ... أما 

- أما ؟ نشالله خير ...

- لا خير ... ما تاخوش إلي تحبها ... كان تحب تعرس انا يلزم نوافق عليها ... نحب نتهنى عليك فالغربة هههه 

- فهمتك ... 

- امالا كي متفاهمين ... تو نكلمك نهار عرسك نباركلك ونذكرك بموعد الرحيل 

رجع بنفسجيست لدارهم وحكى لولديه عالي صارلو ... وبكات امو وبكى حتى هو ...

وكلم  خطيبتو إلي يعرفها منذ 7 سنين ... قصة حب كبيرة ... معروفين الزوز فالبلاد مالي بداو يتقابلو فالتراكن موش بعيد على "الليسي"   ...وتضحياتهم من أجل أنهم يعديو بقية حياتهم جميع معروفة ... على خطرها بطل ملدكتوراه إلي كان بش يعملها في الغابات المتحدة ... و على خطرها تحلو وجهو من السماعة للوكالة ورصاتلو حط فلوس عرسو في عملية تنحي الطشليطة ... على خاطرو ضحات بشبابها وحرمت روحها وقت كان فالخارج ...وعلى خاطرو شربت الجفال وقت جاتها إشاعة باللي هو مات في حادث مرور ... 

فكر مليح قبل ما يقابلها كيفاش باش يفسرلها الوضعية ... وكيفاش هي باش تتقبل الحكاية ... هي كبرت وباقي تستنى فيه على خطرها تقليدية وتصبر في روحها كيف ما كانت ديمة تقلها أمها ... حبتو وغمضة عينيها على أخطؤه ... حبتو برغم من الفوارق المادية إلي بين عايلاتهم ... يعرف مليح أنها بعدو باش تفقد الأمل فالرجال ... 

- مو لاباس ... جبتني نجري سقيا أعلى من راسي !! شبيك بنفسجيست احكيلي ؟؟ شبي وجهك مش عاجبني ؟؟ طمني ...
- جواز سفر متاعك ... وقتاش يوفى ؟؟
- العام الجاي ...
- غدوة نعرسو ... وبعد غدوة نمشو لكندا ! 
- شنوا ؟؟ جايبني نجري باش تتمقسس عليا ؟



 هز روحو وخرج من المطعم ... جبد التليفون وكلم الثعلب يسال فيه على  حكاية  "الباسبور" ... طمنو الثعلب وقالو نهارت إلي باش تطلع فالطيارة نجيبهولك للمطار ... 
حب الثعلب ينسنس على أمور البنفسجيست وبعد ما عرف المكان المحدد متاعو بعد المكالمة ... كلف أحد الذئاب باش يعطيه "رابور" ...

- شبيك خرجت وطفيتني ؟؟ شبيك ... قلبي ما قايلي خير ... 
- باش نبيع الكرهبة ... وهاني دبرت شاك ... الليلة نستدعي صحابي نعملو عشاء وسهرية وغدوة بعد العصر نكتبو الصداق ... هاني كلمة شكون باش يشوفلنا عدول عالطاير ...
- يرحم فمك ... ما نحبش نعرس عالطاير ... صبرت صبرت وبعد نفطر على جرادة ؟؟

ضربتلو في مخو يشريلها عركة ويخرجها غالطة ويرتاح ويمشي لكندا يشوف وحدة من غادي وينسى هم الغابة متاعو ... لكن ما ينجمش يعفس على قلبو ... هو إلي كانت ديمة عند كلمة وما يحب يغدر حتى انسان  ما ينجمش يوجع أقرب الناس ليه ...

- اسمعني مليح ... عندك فيا الثقة ؟
- موش حكاية ثقة ... أما دارنا وانا ؟؟ وقتاش نجيب صاحبتي وقتاش نمشي للحجامة و أمي ؟؟ لا صعيبة حكايتك ...
- داركم خليهم علية ... إنت موافقة ؟؟
- انا معاك حتى للقبر 
- ربي تعطيني القوة والصبر ... هاها 
- ديمة تتركك ؟؟ أمانك قلي اش فما ...

هكك وتليفون نوقز ... ميغالو يكلم فيه ... إقترح عليه انو يطلع معاه في نفس الطيارة على خاطر هو زادة مشي لكندا في زيارة فجئية ... وافق البنسجيست رغم انو معادش يحب يشوف هاك الفطشاطة  ... 

- بعد غدوتين ... باش نركبو فالطايرة الملكية ونمشيو لكندا ... أهوكا شكون كيفك ؟؟
- انا ما نحبش الحكايات هذي ... فقط نحب ناخو شوية وقت ونعملو عرس كيف الناس ...
- عديلي هذي ... اش يهمنا فالناس 

روح بنفسجيست بعد ما حكى مع والدي خطبتو ... حديث كان طويل وما جاء يقنعهم كان بطلوع الروح ... وبعد ما كلم صحابو الكل وعمل سهرية للصباح ... دخل للدار يلقى امو تصلي وتدعيلو بالتوفيق ... استناها حتى تكمل وعطاها بوسة على جبينها وهبطت دمعة من عينها ... مسحله الدمعة وقالها "الحي يرجع يا غالية ... ما تخافش عليا" ... دخل لبيتو ودخل على الانترنت يلوج في "كاميرا" و"بيرو" قمقوم يشريهم دوب ما يوصل لكندا ويبدا يرفع فالتحديات ويعطي في التوجيهات من أجل الإطاحة بالنظام الملكي ...  وكلم خطبتو يفسرلها فالحكاية ...

كمل العرس على ما يرام ... فرحو الناس الكل وبات مع مرتو في نزل مش بعيد على المطار باش هكاك ينجمو يرقدو أكثر شوية خاصتاً وانو السفرة باش تكون مرهقة ... 

من غدوة فاق بنفسجيست إمخر وخرج يجري ما لقاش حتى الوقت باش يخسل وجهو على خاطر مرتو قعدت تحذر في روحها ونساته ...   
وصلو للمطار إلي على غير العادة كان فيه عدد غير عادي من حنوشة وثعالب ... 

يتبع   

إقرأ المزيد... Résuméabuiyad

الاثنين، 13 ديسمبر 2010

قصة ميغالو و بنفسجيست ... الجزء الثاني

ورجع بنفسجيست إلى مكان إجتماعو مع ميغالو من بعد ما كمل المكالمة مع الحنينة ... يلقى ميغالو يستنى فيه على أحر من الجمر يحب يعرف شنية حكاية العرس .. علق بنفسجيست "الفيستا" متاعو في المكان المحدد وجلس حيث صديقه الملك ...

- أيوه، سي ميغالو، عاد قتلك الغابة فيها شوية متثقفين وبرشة حمير يحبو الفيس والتنبير وعام وطولو ضاربهم الكساد ... حتى المتثقفين إلي قراو و تخلاوعن الجهل وكانو يحلمو بمستقبل نير ... وخاصةً إلي عملو استاذية (ربي معاهم إلي يعديو "كباس" على قريب) ...

الغابة يا ميغالو تعرفت بالأكتاف و" تشري يومية" و"جيتك من طرف الحيوان الفولاني" ... الفساد هذا خلا معشر البهايم وبعض المتثقفين يقومو باجتمعات سرية يلوجو على خطة بش يطالبو بها بإصلاح قانون الغاب هذا إلي معادش يوكل الخبز ... وصل الخبر للأسد من طرف زوجتو إلي كانت تخاف برشة على ملك رجلها وحذرتو من البهايم إلي ناوينلو على خلاها ... فثارت ثائرة الملك وصاح في بعض الذئاب من سكان الغاب أن يأتوه بخبر هؤلاء الذين يريدون الإطاحة به ...

و كانت أول مرة يكتشف فيها الملك قيمة الذئاب ... ففي لحظات قليلة رجعلو ذيب بأخبار في قمة الأهمية ومعاه ليستة متع أسماء الناس إلي لقاهم مجتمعين وزاد من عندو زوز أو ثلاثة عندو معاهم بونتو ... من وقتها قرر الملك انو يحرم إجتماع أكثر من زوز مواطنين مع بعضهم إلا  برخصة وزاد كثر في عدد الذئاب حتى صار عددهم يناهض عدد الحمير ...

وفي تلك الأحيان دخلت إحدى الخادمات بالقصر وحملت معها الكم الكثير من الخيرات ... غلال وفواكه جافة ومشروبات من كل الأصناف ... كانت الخادمة روعة في الجمال وكانت مسلحة بإبتسامة رقيقة زادت فيها الشطر ...و قعد بنفسجيست يتبع فيها بعينيه حتى خرجت ...

- تعرف يا بنفسجيست ... كان بودي أنك تحكيلي على حكاية العرس وأخطانا من الأمثلة والعبر 
- اش تحب نحكيلك يا ميغالو ؟ كل شي بالتسهيل و الطيبات للطيبين ...
شوف يا ميغالو ... المصيبة في الغابة هذيك انو الذيوبة والحميرو المتثقفين كانو يد وحدة ... ولكلهم دافعو مع بعضهم على غابتهم من الأخطار المحدقة بيهم وبغابتهم العزيزة عليهم ... ولكن الخبزة المرة جعلت الذيوبة يكشرو عن أنيابهم ويتحولو إلى أكلت لحوم الحيوانات ...


- ملة حكاية يا بنفسجيست ... احنا العباد ما عنندناش الشيء هذا ... احنا عندنا كلمة وأمانة وصدق 
- يا ميغالو ... سامحني أما على الدزة متاعك من قبيلي وإنت تقاطع فيا بش نوليو كي الحيوانات إلي نحكيوعليهم ...

باهي توا إنت بديت تفهم شوية الحياة اليومية إلي فالغابة وإلي هي معقدة برشة ... أما بحول الله تبعني مليح توا الرؤيا توضاح ... قلك عادة الذيب (إلي هو في أغلب الحالات شاب بطال ومطرد نهائيا من جميع المعاهد بسبب الوقاحة وسب الجلاله و تلقاهم سقاط من الدرجة الأولى) يبدا يدور وعينيه ووذنيه شادين "ڨارد" يا بوك يشوف أو يسمع ثلاثة مواطنين أو أكثر يحكيو ... يجري عجاجة لمركز الحنوشة إلي فيسع ما يهبطو على المجموعة كهبوط الغيث من السماء ويترفعو ... ثم يتم الالقاء بهم في اقفاص حيث يتم ترويض ما تيسر ترويضه ثم ادماجهم في السيرك الوطني ...

- سيرك ؟

 - كان سكتت راك حجيت ...هاو نعطيك لمحة على السيرك الوطني ... يا سيدي متكون من ثلة ثعالب ملاقيط ليكس وولاد حرام لا دين لا ملة أخبث منهم ما ثماش و أفات في إختراع الأكاذيب والأساطير حتى يسكتو الحيوانات إلي مش فرحانة... قول اللطف وبرا ...

الثعالب هاذم يخدمهم حسب التقريب 2 ملاين من الضبوعة ... أي نعم وهو ما يمثل خمس سكان الغابة ... الضبوعة يا صديقي همهم الأول والأخير هو التقرب من الثعالب وعلاش لا ما يوليوش ثعالب بدورهم أو حتى أسود لو سنحت لهم الفرصة ... 

- ملا غابة وملا قانون ... تو الغابة هذي موجودة بالحق ؟
- إي نعم يا غالي ... تي حتى الولايات الحيوانية المتحدة حارة فيهم ... أية سيدي يجيش على بالك انو الصيد الكبير مهوش معبرهم وعامل مولى الدار مش هوني ... 
- أنا ما نحبش نكون كيفو ... نحبك تقلي كان غلط معاكم ... إنت عندي فيك الثقة 
وعلى ذكر كلمة ثقة ... تحل باب القاعة إلي مجتمع فيها ميغالو و بنفسجيست على مصراعيه ...و صاح ثعلب من ثعالب ميغالو في جنوده أن يلقو القبض على بنفسجيست وتنطر أحد الاحناش عليه فكمم له فمه وكتفلو يديه وساقيه وحتى وذنيه ... 
      
إقرأ المزيد... Résuméabuiyad

الأحد، 12 ديسمبر 2010

قصة ميغالو و بنفسجيست ... الجزء الأول : مقدمة

غزر ميغالو الملك إلى صديقو المقرب بنفسجيست وقال ... يا بنفسجيست إضرب لي مثل قوم فاقدي شيء ويدعون أنهم إمتلكو الحكمة والعلم ...

هبط خونا بنفسجيست راسو وفكر وزاد فكر وتنهد :

- يا ملكنا الموقر ... يحكى انو في غابة تسمى ب"رأس اللحم" ... موش بعيدة علينا برشة ... أكثر سكانها حمير (حشاكم وحشى قدركم) لا يبلو لا يعلو عايشين كبقرة الله في زرع الله ... كانت الحمير عندها عديد من الأهداف من أهمها التنبيرة متاع نهار الأحد فالليل بعد مباراة رياضية وكذلك ...

- يا بنفسجيست اش معناتها تنبير ؟

- ههه تنبير يعني أنك تشد واحد تتركك عليه وتزيد تتركك و إطلعلو الدم والسكر حتى لين يسبلك عرشك وقتها تتفرهد وتقول عملت أفار وعديت ليلة ما كيفها ليلة ... أملا يا ميغالو لا يزي بهايم زيد فاضيين شغل ...
أية خلي نكملك ... قتلك مع التنبير بن اهدافهم زادة انو يكون عندهم أخر صيحة في عالم التكنولوجيات ... من "أيفون" و"نيكسوس ون" وبرشة حاجات أخرى ..

- شنوا ؟؟ بهايم بليفون ؟؟

- إي إي يا ميغالو الغالي ... انا زادة نخمم باش ننخرط فالحسينية -إلي باش تأسسها عزيزتنا غيغوز- ونبدى نندب ونلطم من غدر الزمان ...


الحاصل يا سيدي ... أما كانت عندهم مشكلة البهايم هاذم أنهم ما كانوش يخدمو ... كانو نهار و طولو وهما يجارو وراء "أسيادهم" فماش ما يحرثو عليهم شوية ويعطيوهم ما ياكلو في أخر النهار ...

- كيفاش كيفاش ... ما عندهمش ما ياكلو ويحبو عالتليفون أخر "موديل" ؟؟

- يا ولدي بهايم أما ما تنساش نحكي على الأكثرية إلي ديمة تنهق وتصيح ... تو نفسرلك كل شي ... و شبيك كل مرة تقص عليا سي ميغالو ؟ اصبر خلي نحكي ومن بعد علق ... حالة فيك !!

- باهي باهي ... أحكي نسمع فيك وسامحني ملفوق

- إيه فينهم الملوك إلي كيفك إلي يعرفو يعطيو قيمة للحاشية متاعهم ويعطيو لكل ذي حق حقه ... ويطلبو السماح ...

- فاقد الشيء لا يعطيه يا بنفسجيست !

- كيفاش ؟؟

- يعني إلي ما يفهمش شمعنتها حقوق الشعب ما ينجمش يعطيهم حقوقهم ...

- ماهأه ... موش هك يا سي ميغالو ومرة أخرى خلي نكمل نحكيلك مكانش تو نبطل ... 

 أخيرا ميغالو سكت وحط يدو على خدو وبدا يتفرج في تقاسيم وجه البنفسجيست إلي بدا يتقلق من اسئلته التافهة ... وجهو بدا يطفى والحماسة إلي كانت عندو مالول بدات تمشي وكأنو تفكر حاجة مهمة ...

- شبيك يا بنفسجيست ماو لباس ؟؟

- لا لاباس ... أما ...

- أما شنوا ؟

- تذكرت إلي الوالدة الله يبقيها تحب تحكي معايا في موضوع مهم ...
- موضوع ؟؟ ... كان تحب احكيلي 

- إي ... تحبني نعرس ...أية تو نخليك نمشي نحكي معها بال"سكايب" ونرجعلك !
إقرأ المزيد... Résuméabuiyad

الخميس، 9 ديسمبر 2010

أسياد أم عبيد

البنفسجي انسان طيب... يحلم كأيها الناس ... البنفسجي انسان لطيف ضريف دموخفيف ... يحب كل الناس وقلبو حساس ...
البنفسجي يحلم بالشهرة والمناصب المرموقة ... وفتح الأبواب المغلوقة ...
البنفسجي يشيخ ... كي يقدم ويخلي شكون التالي ... على خاطرو انسان زوالي و يحلم بش يولي مدير ولا والي ...
هو انسان ذكي ... ما يوقفو حتى شي ... شعارو نجمة وهلال... يسترجل مرة فالفال ...عادي كيف يطيح السروال ويدفع الأموال ... البنفسجي للكرسي طماع وعلى خاطرو الشرف يتباع ... كي يقربلو يزيد الإشتياق ويكثر النفاق ... 
البنفسجي يحب يولي من الشرفة... وياكل الحوت بالمغرفة ...
ماهوش دغفة يحب هزان القفة وضربان البندير ويكره حرية التعبير... قلبان الفيستا ما يقلقوش والكرامة ما عندوش ...


أما البنفسجيين الأحرار ...هما ناس ابرار هابط عليهم الدمار ... يحلمو بالكرهبة والدار وفلوس وصغار ... أحلام طارت كالغبار كي عرفو نهاية المسار ... ناس تحب البلاد كرهت فيها الفساد ... 
عباد ... تحب الحرية والديمقراطية ... تكره الظلامية والتلفزة البنفسجية ... ناس جرات وقرات والخدم ما لقات ... ركبت البلنسيات وفي الغربة شبابها فنات ... قهرهم الغش وطارتلهم من عيشة الهوش ...
فيهم ناس تعبت مالتصفيق وبدات تفيق ... عيات مالتنوفيق ...
وفيهم ناس فالسجون تنسات على خاطر الفجر صلات ...
وفيهم ناس لا قرات ولا عرفت "ليسيات" ... على خاطر بلادها دمومتها جرات ... باش البنفسجي يلقى فين يبات من غير تضحيات... ويرفع التحديات ويشتت عائلات فالحبوسات ...يعملو المنتديات والملتقيات ... ويحلمو بالتمديد واننا نكونولهم عبيد ... ويربيو النمورة والبلاد ياكلوها غورة ...
     
كلام اليوم بسم الشعب المظلوم ... بسم كل من هو من حريتو محروم ... بإسم كل من يبكي عالضروف ... وفالعيد ما لقاش خروف ... بإسم عباد حفات وتعرات وعلى ساقيها الفلقة كلات ... على خاطرها حبت البلاد ودافعت على الحريات ...

  

إقرأ المزيد... Résuméabuiyad

الثلاثاء، 7 ديسمبر 2010

أعمل كي خوك لا يعايروك 2

أنا شديت الميكرو في يدي و أمي بدات تتبسملي وكأنها تحب تقلي "أهوكة كيف ما وصيتك"

تمنيت فاللحظة هذيك أنها ما كانتش قدامي على خاطر بديت نتربث ... قبل ما نقول حتى كلمة رميت عيني على الحضور ... ألوان وأشكال قاعدين يستناو فيا باش نشكر ونمجد كيف وخياني إلي حصللهم الشرف عبرو وعطاو كلمة وصفقولهم ...
ما عرفتش منين نبدى خاصةً كي شفت أسماء (هذيك إلي عجبت أمي) مركزة معايا ... سميت بإسم العالي وتوكلت عليه :



- عالسلامة الناس الكل ... كي وقفت قدامكم اليوم وخذيت وسام الشرف هذا حسيت إن العلم هو أسمى حاجة ينجم يتميز بها الإنسان ... هذاك علاش نحب نشكر قبل كل شي الوالدة العزيزة إلي قاعدة بناتكم ونوجهلها تحية على وقفتها معايا ... نحب زادة نشكر بابا إلي مهوش هنا ... نشكركم الكلكم على حضوركم وكدلك على وقفتكم مع أولادكم إلي هي وقفة فيها برشة تضحيات و مش ساهلة ...

أية سيدي هذا الشكر وكملتو ... لا ما نسيت حتى حد البلدية وما جاورها مانيش بش نشكرهم ... على شنوا نشكر فيهم ؟؟ ماو لباس ؟؟ هاكاك وبديت نسرح والعباد بداو يصفقو وجاء السيد الكريم رئيس البلدية :


-صحيت ولدي أية تنجم ترجع لبلاصتك ...

وقتها فين خرجت من شبه الغيبوبة إلي دخلت فيها ... غزرت للوالدة وكأني نحب نقلها "مزلت نحب نحكي " وهي تقحرلي (ثلاثة نقاط فوق القاف وسامحونا على تعبكم) وكأنها تحب تقلي "عيش ولدي اليوم أسكت"


سي رئيس البلدية مد يدو يحب على الميكرو ... غزرتلو ويا ليتني ما غزرت ... تذكرت البوسة إلي مازالت ما شاحتش وإلي يلزمني نتمكن من تنشيفها قبل ما تتسربلي كميات لباس بها من التسكبين و هزان القفة إلي بلاش وذنين عبر الثقب إلي تتنفس منهم الجلدة متاعي ... بعدت يدي بش ما يفسعليش بالميكرو وقتلو:


-مزلت ما كملتش 
- باهي ازرب مالا ... فما شكون يستنى في دورو !!
- نعرف أما عندي إقتراح هام نحب نطرحو عليكم
- نسمعو فيك ... أية يا جمعة من فضلكم إستمعو لولدنا عندو إقتراح ..


وقتها تذكرت ايامات المعهد الكل ... والمعانات متاع "جيب ولي" و "عندك إنذار" ... تذكرت زادة التغيير الكبير إلي صار في حياتي الدراسية ... ليلة إلي بتت فالمركز والمتراك تمسد فيا على خاطر على حسب كلام مدير المعهد أنا "مجرم حرب متخفي" وتسببت بوحدي في المظاهرات من أجل فلسطين ... وقتها فهمت انك في البلاد هذي يا ترفع التحديات يا ترفعك الباڨة  (مش نورمال لقيت ڨ ) ...كي تذكرت حكاية المتراك ... تدكرت إسطوانات الشاب خالد إلي كانو في " الساك ا دو " وفتفتهملي البلالج إلي تولى "تربيتي" حسب ما قال... وما فقت من هل ذكريات كان كيف جات عيني في عين أسماء ... نظرتها كادت تسلب مني أنفاسي وكدت أنطق شعرا ... أدركت نفسي وهذبت وقفتي :


- إقتراح عندي مدة نخمم فيه ... توا في دار الشباب متاعنا ديمة تعملو نشاطات ... أما الكلها شطيح ورديح ما يفيدنا في حتى شيء ... نحب نعرف علاش ما نعملوش حاجة تفيدنا وبكوننا في يوم العلم حبيت نشوف مع سيادتكم علاش ما نعملوش ورشات نتعلمو فيها "الروبوتيك" ... ورشة يأطروها اساتذة من المعهد متاعنا ... والله ما تتكلفش غالية ...


كنت كل ما نزيد كلمة كل ما يزيد سكوت العباد ... كل ما وجه رئيس البلدية يزراق ... و قلت في قرارت نفسي إلي الناس عجبتعهم الحكاية وخذيت أكثر ثقة وبديت نتحرك فوق الركح ونحكي بصوت أعلى ...


- الأساتذة هاذم ينجمو ياخذو سوم رمزي من عند البلدية بش نشجعهوم على وقفتهم ... ويقريو التلامذة المغرومين ... وحتى لو كان ما فماش عدد كبير من الأول تو يكثرو من بعد ... إنجمو من بعد نعملو مجلة صغيرة على الإنجازات متاع الورشة ونفرقوها في الديار الكل ... يفرقوهم أولاد العايلات فقيرة الحال ونعطيوهم سوم صغير ... مصروف متاع الشهر متاعهم ... 


وأنا فوق السحاب متاعي نحلم بالمدينة المثالية ... إنسجام وعلم وناس تخدم في مخاخها في حاجة مفيدة ..


- هههه ولدنا يحسبها ساهلة الحكاية إلي جايبها هههه 

وبطبيعة كي تبدى واقف أمام شعب بندار وفي هزان القفة فنان ما تستنى منو كان باش يضحك عليك كيف ما عمل "سي" رئيس البلدية والشلة وجوه اللوح إلي مترصفين بحداه على المنصة القصديرية ... في اللحظة هذيك حبيت ندخل عليهم كل واحد بمشطة وصرفاڨ فماش ما ينقصو شوية من البهامة ...

- يا ولدي متعب روحك ومتعبنا على حكاية صعيبة ... احنا مسؤولين ونعرفو قداش يلزم تضحيات وفلوس على الحكاية هذي ... هههه جريدة وورشة عمل نكملو نعملو مدينة العلوم وأكهو 

وزادت تعالت ضحكات القوم ... جيت نطلب في حاجة تعود بالنفع على الناس الكل وليت كركوز ؟ ... ما حبيتش نقولو إلي هو مسؤول فاشل وأبسط حاجة (تعديل الطرقات) ما يعرفش يعملها ... ما حبيتش نشكر الأولياء والتلمذة إلي شاخو عليا ضحك بينما كنت انا الوحيد إلي شكرت الناس الكل على تربيتهم لأولادهم ... يمين البكوش في صدرو ... سكتت على روحي ...

- أية ولدي مرة جاية فكرة على قد مخك بش إنجمو اناقشوها
- على قد مخك إنت تحب تقول 
- نعم ؟
- لا حتى شي قلتلك باهي ... نرجع لبقعتي ؟
-إي تنجم ترجع ... أية صفقو عليه 

وهزيت راسي نغزر لأمي بعد ما حاولت نتفاداها ونتفادى غزرتها وقت إلي كنت نحكي باش ما تأثرش عليا ...كنت راجع لبلاصتي ونسمع في التصفيق لكن ما كان يعنيلي حتى شيء ... كنت نردد في داخلي أغنية للشاب خالد كنت ديمة نواسي بها نفسي ... 


وقت شافتني قريب نبكي رققتلي عينيها وكأنها تقول "راك ولدي وديمة نبقى فخورة بيك" ... رجعت على الطاولة وتلطخت
على الكرسي بكلني خيبة امال ... قالتلي :

-إياه مليح فيك ... شفت كيفاش ما تسمعش كلامي ؟
-فك علينا ... انسى 
-ناس بكري يقولو " أعمل كي خوك لا يعايروك" وإنت ديمة تحب روحك مبدع ... أهوكة ضحكو عليك !!
-هذي تربية اديك ... معاش تستعرف بيا تو ترتاح من البدع متاعي ...

إقرأ المزيد... Résuméabuiyad

الاثنين، 6 ديسمبر 2010

أعمل كي خوك لا يعايروك 1

وقت نجحت فالباك (يا حسرة ) ... البلدية إلي نسكن فيها نضمولنا بمناسبة يوم العلم حفل تفريق جوائز للتلامذة اللي جابو معدلاة باهية  فماش ما يلقاو في هلتلامذة الخليفة المثالي لمعز الصوابني ...
وأنا بصراحة ملي نقرا فالسنة الأولى إبتدائي نكره هلحفلات هاذم ونكره كل ماهو تصفيق وتقبيل قدام الملأ ومصور يحبك تضحكلو وأمك تشيرلك بيدها وهي قاعدة فالصف الأول قدام الناس الكل وتحب توريهم إلي إنت ولدها موش تابع وحدة أخرى ... كنت نمشي أكثر حاجة على خاطرها هي باش نفرحها ... وباش هكك فالصيف تمشيلي شوية مصروف !!
الحاصل حكاية يوم العلم كنت رافضها على خاطر كنت نعتبرها (ومازلت) رويق فارغ ... وزيد ميلفوق الإستدعاء جابهولي واحد (عندنا نفس اللقب أما موش قريبي) في تكويرة على خاطر غلطو فالإسم ... بدات الوالدة كيف العادة تهجم:

- يعيش ولدي ... علاش تحرم في روحك من جائزة تستحقها ؟؟
-تي بوليتيك كلو ... حكاية فارغة وباش نفلت النصف نهائي متع التورنوا متع الفوت في جرت كتاب ومنقلة ... لا ما نحبش 
-نعرفك ديمة وجه هدودو ... حشمان مالعباد شهمك فيهم ... برى ولدي يهديك ... أية نمشيو تو نلقاو طفلة باهية قارية تعرف عليها 
- ههههه ... وحدك كي تبدى تهز وتنفض 
- أمان ؟
- تي بربي تصورني طلع نبوس في رئيس البلدية ... محلاني عطي خدي لواحد ما يحشمش ... ولا هاك العمدة (السيد هذا من كثر ما يخمم فيا بعثلي إستدعاء متاع الجيش ملي عمري 18 سنة )  ماو تعرفني قداش نبخر بريحتو... يعيش ميمتي فك علينا منهم !!
- باهي أهوكة ما تاخوش بخاطري ... وأنا فخورة بولدي ووو-
- باهي باهي يزي ... أما ما نلبسش سروال ... نمشي بشرط وشلاكة بو صبع وبرشة فيهم 

وجاء اليوم الموعود ... نهار في أوت ... سخانة يا لطيف وهما جايبينا في غرغور القايلة وطالع أنا والوالدة للمعهد باش يعطوني وسام إلي بصراحة عجبني خير ملكتب إلي مستانس ناخذهم ... 
يومها وبما أنهم كانو تلامذة مصفيين من أطباء متخرجين جدد ومهندسين واساتذة وووتلامذة بكالوريا ... عطاو لكل واحد دقيقتين باش يوجه كلمة في الميكرفون ... انا كي شفت الحكاية هك تحمست ووليت نستنى في دوري ... 
الوالدة شافتني متحمس شمتها قارسة وبدات توصي :

-نعرفك لسانك ما يهنيش ... تمشيش تفضحني ؟؟
- شنية ما يهنيش ؟؟ على خاطر نطالب بحقي ؟؟
-إليوم ما طالب بشي ...كيف صحابك نحبك شوف محلاهم ... اشكر إنس الكل ...عيلتك البلدية المعهد والرئيس زادة ...
-إم تو نشكرهم ...
-عيش ولدي بلاش مشاكل ... سمعتني ؟
-شعندي قلت ؟؟ باهي تو كل واحد يستحق الشكر نشكرو ...
-باهي ريتها أسماء إلي تقرا سيونس والله محلاها 
-عندها شكون ... (وألحق يقال ... حيرتلي مواجعي)

وقبل ما تزيد تسالني عيطولي ... طلعت ونحس في روحي سخنت في ضرف 10 ثواني ... حسيت إلي الكلام إلي في مخي باش يحشم الوالدة وباش يجيبلي مشاكل لكن كنت عازم على أني نقولو لأني مانيش باش نسب أو نجرح ... رئيس البلدية عملي بوسة على خدي بالعرق ... خلاني فقدت تركيزي وحاولت نمسحها مغير ما نشلق لكن ما نجمتش ... استحملتها وتوكلت على المولى ...

أنا شديت الميكرو في يدي و أمي بدات تتبسملي وكأنها تحب تقلي "أهوكة كيف ما وصيتك" 

 يتبع

إقرأ المزيد... Résuméabuiyad

الأحد، 5 ديسمبر 2010

الأحد الموسيقي 3

ما غير مقدمات ... نخليكم تستمتعو بالنقشة متاع الاسبوع هذا ... نهديها إلي كل من هو عزيز على قلبي ... وإلى كل من يزورني بانتظام  في المدونة هذي

صباح فخري - إبعثلي جواب



إقرأ المزيد... Résuméabuiyad

الخميس، 2 ديسمبر 2010

شبابنا المهزوم

الشباب هم خيار المستقبل
الشباب هم الحل وليس المشكل
الشباب ... الشباب

2010 السنة الدولية للشباب ... الشنوة يباركو من هكا و الأخرين يبندرو من هكا ... والشباب ...
الشباب ترى فيه من المفارقات ما تدمع له الأعين ...

فما شكون يحلم بالكرهبة اخر موديل والايفون والطفلة الرشيقة ... وفما شكون يحلم بخبزة ياكلها ويوكل عيلتو ... وفما شكون يحضرو المنتديات والإجتماعات ونشفوهم فالتلفاز يتكلمو بإسم الشباب ولكن الهدف الأسمى متاعهم هو إرضاء هذا أو ذاك حتى ينالو الرضاء ويعلو المراتب ...

الفجوة فالمجتمع متاعنا ولات كبيرة وماشية وهي تكبر ... في بلاست ما تشوف ثلاثة طبقات ... المجتمع متاعنا إختزل في طبقتين (هذاك حد الجهيد) طبقة عليا وماشية وتعلى (والله أعلى ملكل) هي إلي عندها النفوذ الكل وتكسب الثروات والمناصب ... وطبقة فقيرة وهي التي تمثل الأغلبية وكل يوم تزيد تفلس ... طبقة همها أنها تلقى ما تاكل وتخلص فاتورة الماء والضوء ...

الطبقة الثانية أصبحت وكأنها حاقدة على الأولى ... تحس في روحها مظلومة وحتى واحد لا يحس بما تعاني فيه كل يوم ... وكل ما تزيد الفجوة تكبر كل ما تزيد الأحقاد ... وهذا ما يفسر العمليات الإجرامية من خطف واغتصابات وسرقة وقتل إلي كثرة في الأيمات الأخيرة ...

الفقر أصبح عيب في بلادنا ...الشاب الفقير يلزمو يسكت كي الغني يتكلم ... يلزمو ياقف كي الغني يتعدى فالطريق و كأنهم عبيد ...الشاب الفقير إن وجد عمل فإنه في أغلب الحالات لا يتناسب مع ما كان يحلم به حين كان طالب فالجامعة هذا في حالة ما إذا وصل إلى الجامعة وما خرجش من الأبتدائي أو الثانوي على خاطر يلزم يخدم بش يلقى ما ياكل ... الفقراء هاذم لا نشفوهم لا فالتلفزة ولا في غيرو وكأننا نريد دفنهم أو اخفائهم حتى لا نرى ما يعانونه ...

الشاب "الزوالي" يشوف في غيرو من بني وطنه ... يلعبو ويضحكو ويسهرو وهو يعيش في حالة إحباط ... الإحباط إلي يولد ألشعور بالهزيمة والكبت ... الإحباط إلي يولد الكره والحقد ...

هذا الواقع المر إلي ما نحكيوش عليه فالتلفزة أو فالصحافة ... زعمة علاش ؟؟
علاش ما فماش أنظمة تاخذ "الزكاة" من الغني كي تعطيها للفقير ؟؟ فين هي المساواة بين الشباب من مختلف الأوساط ؟؟ فين هي الإعانات للشباب ؟؟ و من يستمع إلى أصوات الشباب حين ترتفع ؟؟

فالأخير نحب نقلكم إلي "البلاد" نقصد بها البلاد العربية بصفة عامة ... على خاطر في تونس والحمد لله عندنا صندوق التضامن ونعرفو بكلنا أن "التونسي للتونسي رحمة" ...

والسلام
إقرأ المزيد... Résuméabuiyad

الاثنين، 29 نوفمبر 2010

مساواة وذني ...

اليوم بديت نكتب في تدوينة ما عندها حتى علاقة بهاذي ... أنا هكاكة وقلت نعمل طلة علفيسبوك ونطيح بأرتكل ... قلت برى نقراه ومن بعد نكمل التدوينة ... كل ما نقرا كل ماتتحيرلي المواجع حتى وليت قلت نكتب هلكلمتين هاذم إلي هما أهم في نظري ملي كنت نكتب فيه ...

تفاديا للمشاكل مانيش باش نحط الأرتيكل ...

قبل ما نكتب السطور القليلة هذي فكرت برشة على خاطر احنا في تونس فيسع ما نلصقو تيكات للعباد ... كل واحد نصنفوه في صنف خاص ... ولكن إلي نشوف ونسمع فيه ليوم ينطق ملأجناب ... وتذكرت زاده إلي المدونة ماهياش مكان تبندير ومناشدة ... وماهياش مكان نميحو فيه مع الأرياح ... ونرضيو فيه العامة والطامة ...

هنا بصراحة بش نحكي بقلبي وطرف الإيمان إلي مازال ينبض في عروقي ... إيمان بأنو التونسي مازال ما باعش روحو من أجل 4 دينارات يدخرهم في بنك الزيتونة فماش ما يطمئن قلبو ...

أية مغير ما نطول ... موضوع اليوم حاسس شوية على خاطر من أكثر المواضيع إلي تهاجم في الإسلام ... الميراث ...

كل ما نحل التلفزة أو الفيسبوك ونتفرج في فيديو تمت بصلة ببلد البنفسج يوجعني قلبي ... حكايات تافهة وريق بارد نهار وطولو يعاودولنا فيه في الأربعة قنوات البنفسجية إلي كسبناها ... كرة ، بكارة ، مساواة بين الراجل والمرأة ... والميراث في قالب المساواة بين الجنسين (ولو انو في تونس ولاو 3 ... اش علينا ) ... يقول القايل معقول المرة ترث الشطر علاش لا ما توليش كيفها كيف الراجل (شوية أخر نوليو نستوردو نساء من أفريقيا يحبلو في بلاست نسائنا باش نطبقو المساواة) ...

أول حاجة نحب نقولها وقلتها برشة مرات قبل :ما قعدلنا كان هل حكاية ونوليو مطورين ؟ يحكيولك على التطور تقول كان جات في ميراث تو نعطيه لأختي بكل الميراث فماش ما تصب علينا أمطار التطور ... ونوليو عالم متقدم اناهزو أمريكا في التكنولوجيا متاعها (بذكر أمريكا ... ملة ضحكة الوكليكس ... طلعو مسخفهم حالنا و حايرين فينا من كثر "هزاننا للقفة" باش ما نقولش حاجة أخرى توفى بالنا حتى هي) ..

يا سيدي اليوم رجال ونساء يعيطو وكشاكشعهم طالعة فالصندوق السحري على حق المرأة في شطر الإرث وتعديل نص القرأن وتفسيرو بما يطابق الأهواء عفواً التطور والتحضر ووو ...

أما بربي أشنوا ألي حرق شعيركم عالمرا ؟؟

صحيح المرأة ولات تخدم وتكدح (هذا كان لقات خدمة ساعة وزيد أنها الأغلبية تخدم بمبدأ "مكره أخاك لا بطل") ... صحيح زادة انو المرأة التونسية متثقفة وقارية ... ولكنها قبل ما تفكر في إرث ... تفكر في راجل يهنيها ويحميها ويحبها ... تفكر في دار مليئة بالدفء العائلي وتحب تشوف صغارها يقراو وينجحو ومن بعد يخدمو موش يتشردو بين القهوة والقهوة وبين الستاد والستاد الأخر والحاكم يكسرلو في فومو وين يحلو وفالأخر يركب البابور ويشق البحور ويعيط يا حبيبة تشاو ...

علاش ما نوجهوش كلامنا للراجل ونقوللو كون راجل بمواقفك مع النساء إلي تحيط بيك ؟؟ علاش ما نعلموهمش حب المرأة واحترامها ؟؟ حبها وتقديرها موش على خاطر الوالد متاعها الله يذكرو بالخير خلالها تركة باهية أو على خاطر عندها bac + 15 وفي اخر الشهر تجيب دزة ...

علاش قبل ما اناقشو ايات الميراث فالقرأن ... ما نذكروش انو الرسول صلى الله عليه وسلم كان يحب المرأة ويحطها في عينيه ...

وفوق هذا الكل السيد أو الأنسة إلي تجي فالتلفزة وتحكي على الميراث والعدل وطار وبندير ... و عازز بهم حال المرأة في تونس ... ياخي تحب أمي أكثر مني ؟؟ تحب أختي أكثر مني ؟؟ تحب مرتي أكثر مني ؟؟ أو بنتي ؟؟
إنت باش تتحير أو تتقلق كي بنتي مستقبلها يضيع على خاطر ميراثها بالشطر مع خوها ؟؟

و فوق ملكل بربي اش مازال ما يتورث في تونس ؟؟ تي هاو ملكو كل شيء والشعب قعد علحديدة ...

غريب أمرك يا بلاد البنفسج ... ما يتكلم فيك كان المرتزق أو التافه ...

وبرى ورثة المرأة الشطر تسميوها مساواة ؟؟ الراجل يخلص النفقة ... الراجل يخلص المهر ... الراجل ما عندوش جمعية "ني أومو ني سومي" إدافعلو على طرف هوى مازال يتنفسو ... وبعد تقلي مساواة ؟؟

وساويو بين الجهات قبل ما تساويو بين الجنسين ...

والسلام
إقرأ المزيد... Résuméabuiyad